مسلم بعد عودته من الاعتزال: كنت مؤذن 3 سنين قبل الشهرة والسبكي رفض يسلم عليّ

تحدث مسلم مؤدي المهرجانات عن تفاصيل اعتزاله وعودته من الاعتزال قبل أيام، بجانب أزمات مر بها خلال الفترة الأخيرة وبداياته في مجال الغناء.

تصريحات مسلم

قال مطرب المهرجانات مسلم: «أول ما جيت القاهرة السادات مطرب المهرجانات ساعدني، وهو مساعدتنيش أنا بس دا ساعد الناس كلها، ولما جيت القاهرة هو أول واحد سمعني».

تابع مسلم في تصريحات تلفزيونية له: «وكان هو مكسر الدنيا وقتها وكان معجب بصوتي، ولما روحت لأحمد السبكي لأني سمعت أنه بيساعد ومطلع ناس كتير  سلمت عليه ومسلمش عليا».

مسلم

مسلم والسبكي

كشف مسلم الموقف الذي جمعه بالسبكي، وأضاف: «قال لي عايز إيه فقولتله سمعت أن حضرتك بتساعد وكدا وأنا بغني فراح قالي لا لا روح غني عندكم في إسكندرية والموقف دا أثر فيا جدًا وسبحان الله بعدها بيومين كنت حاسس أن الموقف دا مش هيوقعني».

وفيما يخص أسباب اعتزاله، علق قائلًا: «كان عليا ضغط كبير أوي في حتة النقابة وكنت داخل في سنتين أغاني لي شغالة في مصر ومسمعة برا مصر في الخليج والوطن العربي ومكنتش بنزل أشتغل عشان مفيش تصريح نقابة عشان الجيش وأنا 21 سنة».

استكمل مسلم تصريحاته: «وكان عليا ضغط بردو في حتة الإنتاج ودا أثر عليا نفسيًا لأن أنا اللي كنت بكتب لنفسي وحتة إن أكون حر كانت مأثرة في نفسيتي».

مسلم

اعتزال مسلم

تابع مسلم مطرب المهرجانات عن اعتزاله: «ولسه مخلصتش نفسي من التعاقد، وقولت أنا مش هرجع إلا لما أظبط حالي وأول لما حتة النقابة اتحلت لما دخلت الجيش وامتحنت في النقابة ونجحت وأخذت الكارنيه رجعت».

وقال أيضًا: «أنا معتزلتش بجد لكن قلت في منشور على انستجرام إني هبعد عشان تعبت نفسيًا من الضغوطات بسبب إن نقابة الموسيقيين مكنتش بتديني تصريحات لحفلاتي بسبب شهادة الجيش، ومؤخرًا بحل الأزمة دي».

تحدث أيضًا عن بداياته قبل الغناء، قائلًا: «قعدت 3 سنين مؤذن قبل الشهرة وأنا عندي 15 سنة، كان فيه جامع تحت البيت وكنت كل صلاة أنزل أذن، وكنت ممكن أقعد من الفجر لغاية الساعة 7 الصبح بصلي في الجامع».

مسلم

استكمل مسلم كلامه: «وبعدها بدأت أخد خطوة في الغناء، أنا من زمان كان والدي مطرب وكنت بدرس في الأوبرا في مسرح سيد درويش وأخدت الأول على الجمهورية من أستاذ هاني شنودة، معتز جدًا بحتة الدين ودايمًا عارف أني مليش غيره في الآخر».

زوجة مسلم

قال مسلم عن علاقته بزوجته في تصريحات تلفزيونية له: «كلنا بنغير بس مراتي غيرتها محترمة شوية ومش بتخنق من الغيرة وفي الحفلات بتبقى معايا، وبتتقبل المعجبات وبتبقى فرحانة بنجاحي، مفيش في جدعتنها وطيبتها وهي بنت ناس ووقفت معايا كتير».

بعد اجتيازه اختبارات «الموسيقيين».. مسلم يحضر مفاجأة للجمهور |خاص

مسلم يعلن عودته للغناء بعد الاعتزال ويكشف موعد حفله الجديد