مصطفى هريدي: إيناس الدغيدي حطاني في دماغها واتعلمت من الزعيم إن مفيش مجاملات

ياسمين حمادة 19 يونية 2023 | 09:47 صباحاً

تحدث الفنان مصطفى هريدي عن سر رفضه العمل مع المخرجة إيناس الدغيدي وذلك عقب فيلم مجنون أميرة، وقال: «ما أسأتش ليها على مدار سنين».

تصريحات مصطفى هريدي

قال مصطفى هريدي في تصريحات تلفزيونية له: «من بعد الفيلم والهجوم عليّ شغل كبير وكان بيترفض ترشيحي فيه بسبب السمعة، وسافرت وقعدت 4 سنين في الأردن عشان الناس تنسى».

وتابع: «فوجئت أنها بتتكلم عني في برنامج وبتتكلم في حاجات يعاقب عليها القانون يعتبر سب وقذف، هل يعقل أن مخرجة تحط ممثل في دماغها كل هذا السنين؟، والصحافة وقتها كلمتني قلتلهم الموضوع عند المحامي خدوا كلامي وقالوا إني خدت ضدها إجراء».

الفنان مصطفى هريدي

مصطفى هريدي وتامر حسني

واستكمل: «لكن أنا مخدتش ضدها اي إجراء لكن أنا كان ممكن أخد ضدها إجراء قانوني والصحافة نشرت ده»، وفيما يخص سبب عدم عمله مع الفنان تامر حسني في أعمال فنية، قال: «السؤال ده أصعب سؤال بيتسألي».

وقال مصطفى هريدي عن عدم تعاونه مع تامر حسني: «أي مخرج أو منتج لما بيعمل كاست عارف إن اسمي بيتحط في الترشيحات لكن في ممثلين تانية ممكن تفوز بالدور وفي الأول والآخر نصيب، وأنا وتامر صحاب جدًا ولكن كل واحد بيفكر في شغله».

وأضاف: «واتعلمت من عادل إمام الكاست ده مفيهوش مجاملات، مش عشان احتمل حد أجيبو في دور مش دوره ولكن كل دور بينادي صاحبه، وبتمنى اشتغل مع تامر حسني أكيد وأعتقد إن شاء الله هيحصل».

عودة مصطفى هريدي للفن

وعن عودته للفن، أوضح مصطفى هريدي أن السيناريست أيمن بهجت قمر هو من شجعه على العودة من الأردن، مضيفًا: «رجعت للفن 2016 وكان بسبب أيمن بهجت قمر وكان بيعمل ليالي الحلمية الجزء السادس وكان شايف إني طولت جدًا في سفري، وكان بيخليني أنزل أعمل كاستينج على أدوار».

واختتم: «لكن مكنش بيحصل نصيب فكنت برجع تاني، وفي ليالي الحلمية قالي تعالى واشتغل وارجع لشغلك هتتنسي، فأنا رجعت وعملت 2017 عفاريت عدلي علام، 2018 مشتغلتش وفي 2019 طلعت في إعلان تامر حسني وأثر بشكل كبير جدًا، تامر حسني اتصل بيا واخترني بالتحديد لأني عملت معاه نجاح في الجزء الأول من عمر وسلمى، والناس تأثرت بالإعلان».

مصطفى هريدي وتامر حسني