ملك أحمد زاهر عن أزمتها الصحية: «كنت مرعوبة.. والدكاترة مش عارفين عندي إيه»

طمأنت الفنانة ملك أحمد زاهر جمهورها ومحبيها بشأن حالتها الصحية، وذلك بعد الأزمة المفاجئة التي تعرضت لها مؤخرًا، والتي أثارت قلق متابعيها على مواقع التواصل الاجتماعي.

وكشفت ملك أحمد زاهر، في رسالة مطوّلة نشرتها عبر خاصية 'ستوري' على حسابها الشخصي بموقع إنستجرام، عن حجم القلق الذي مرت به خلال الأيام الماضية بسبب تدهور وضعها الصحي بشكل مفاجئ وغامض، قائلة: أنا والله ما كنت متوقعة كل اللي حاصل ده، أنا لما حبيت أشارك حالتي الصحية، كنت مخضوضة جدًا على نفسي، وفكرة إن لا أنا ولا الدكاترة حتى عارفين عندي إيه كانت رعباني، وكنت محتاجة بس أوصلكم إن حياتي فيها الحلو وفيها الوحش، وقلت في الستوري إن الموضوع مش الغرض منه القلق، وإني مش عايزة حد يقلق عليا، أنا كويسة، وكده كده أحسن من غيري.'

واستكملت ملك أحمد زاهر، حديثها برسالة إيمانية تحمل الأمل والثقة في الشفاء: 'عندي يقين في ربنا أنه هايقومني بالسلامة، وإن شاء الله تبقى حاجة بسيطة، بس من خضتي كتبت، مع أن ديه مش طبيعتي إني أشارك الحاجات السلبية. عمومًا أنا بس مش عارفة أقول إيه ولا إيه، من قلبي بشكر كل حد سأل عليا ودعالي، والله كله كان بيوصلني، وأنا أسفة لو مردتش على حد، وبشكر كل زمايلي وأساتذتي اللي كانوا بيسألوا عليا كل يوم ومسابونيش لحظة، وكل صحابي وعيلتي اللي كانوا جمبي.'

وأضافت: 'أنا الحمد لله بقيت أحسن من الأول، وبطلت أروح المستشفى الحمد لله، بحمد ربنا إنها جت على قد كده، حتى لو الأيام اللي فاتت كانت صعبة، واللي عندي ده حاجة مخيفة شوية وخضتنا، بس برضو أنا كويسة، والحمد لله إنها جت على قد كده، أكيد ربنا حماني من حاجة أكبر. وأهم حاجة إن عرف السبب بطل العجب، والحمد لله إننا عرفنا.. هي حساسية شديدة في الدم، الموضوع critical'.

واختتمت ملك أحمد زاهر، رسالتها بالتعبير عن امتنانها العميق لكل من ساندها ودعا لها في محنتها: 'بس أنا مطمنة، أنا بخف وبتحسن كل يوم الحمد لله، والشكر لله، ومافيش حاجة خطيرة بإذن الله، وأنا أسفة لو كنت قلقتكم، بس ده مكانش الغرض أبدًا والله. شكرًا من كل قلبي على الحب ده، أنا عرفت غلاوتي عندكم وعند كل اللي حواليا، بشكركم من قلبي.'