منة شلبي بعد تكريمها في مهرجان الجونة: فكرة إنجاز العمر كبيرة أوي على سني

عبرت الفنانة منة شلبي عن سعادتها الكبيرة بتكريمها في مهرجان الجونة السينمائي، بعد حصولها على جائزة الإنجاز الإبداعي، مؤكدة أنها ما زالت في بداية الطريق، وأن لديها الكثير لتقدمه للفن والسينما المصرية.

وقالت منة خلال ندوة تكريمها ضمن فعاليات المهرجان: «حاسة بخوف وتقدير.. فكرة إنجاز العمر كبيرة أوي على سني وعلى اللي لسه عايزة أعمله، أنا مش حاسة أني عملت إنجاز العمر، الإنجاز الحقيقي هيكون لما آخد الأوسكار، بس اللي حصل ده دفعة كبيرة ليا، لأني متقدّرة وخطواتي مؤثرة في أجيال كتير».

وأضافت منة شلبي أن الممثل الحقيقي لازم «يشقى جدًا في الشغل»، مشيرة إلى أنها تعتبر نفسها «هاوية بأجر محترف»، وقالت: «لغاية ما أموت عندي روح الهواية، وبحترم التمثيل جدًا، روح الهاوي بتخليك مبدع، لكن لازم تاخد أجر محترف وتكون عارف قيمتك، بس متخدهاش معاك وإنت بتمثل».

وعن أجور الفنانين، أوضحت أنها تدرك تمامًا مكانتها ومسيرتها، مضيفة: «وأنا بتفاوض إنتاجيًا ببقى عارفة أنا فين ووصلت إزاي، وبشوف نفسي أقل من أقل حد».

ووجهت منة شلبي نصيحة للفنانين الشباب، قائلة: «مينفعش تبقى ممثل والإيجو بتاعك عالي، لأن الإيجو هيخليك محدود جدًا وهيكتفك، وإدارة الموهبة من غير غرور هي سر الاستمرار في المهنة».