منة فضالي: أبويا رماني وأمي كانت هتموت قبل ما تولدني

ياسمين حمادة 29 مارس 2023 | 10:55 مساءً

كشفت الفنانة منة فضالي أسرار وتفاصيل من حياتها الشخصية لأول مرة خاصةً عن طفولتها، وعدم وجود والدها في حياتها، وتركه لها منذ عندما كان عمرها شهرين فقط.

تصريحات منة فضالي

قالت منة فضالي في تصريحات تلفزيونية لها: «طبعًا كان بيأثر في البداية عدم وجود والدي في طفولتي لكن ماما كانت مالية الفراغ.. وشغلالي دماغي ومش بقعد في البيت لوحدي».

وتابعت الفنانة منة فضالي قائلة: «جدتي وجدي وخلاني كانوا معايا دايمًا.. ولما كنت بسأل عن بابا كانت ماما تقولي مسافر شغله بره مش موجود.. عارفه شكله وبشوف صوره.. كنت بشوف زمايلي في المدرسة بيبقى معاهم باباهم ومامتهم وأنا معنديش بابا وكان بيضايقني الموضوع ده جدًا».

منة فضالي ووالدها

واستكملت حديثها عن والدها: «لكن اختلف الموضوع لما كبرت بقيت أشوف الدنيا بشكل تاني والموضوع صعب جدًا بالنسبة للبنت لأن البنت بتحتاح لسند ولحضن يحسسها بالأمان.. ولما يبقى عندها مشكلة في المدرسة ترجع لباباها مش مامتها.. كنت دايمًا بلجأ لجدي وهو كان مدلعني أوي وأنا صغيرة».

وقالت أيضًا: «حتى لما كنت بتعب بنده لماما وأقولها عايزة أشوف بابا .. طبيعي كل واحدة صغيرة في مدرسة عايزة باباها وكنت بتكلم مع بابا وأنا صغيرة بس كل فين وفين.. وكان بيقولي مشغول ومسافر وعندي شغل».

منة فضالي ووالدتها

أزمة والد منة فضالي

وفيما يخص أزمة والد منة فضالي ، علقت قائلة: «مكنتش هفهم الكلام ده وأنا صغيرة بس كنت بتضايق.. كل شوية بسأله هتيجي إمتى؟ وأنا مكنتش أعرف إنهم منفصلين، سابني وأنا عندي شهرين أو تلاتة.. أنا نفسي أعرف ليه؟ بس خلاص متأخر دلوقتي ولما كبرت وبدأت أشتغل عرفت إن ماما اتطلقت وعرفت بعد وقت طويل».

وأشارت إلى أن والدتها كانت أول زوجة له واستمرا زواجهما 12 أو 13 سنة، مضيفة: «أنا جيت بعد معاناة طويلة لماما في الخلفة وكانت بتسقط كتير جدًا وتعبت عشان تجيبني وجالها حمى نفاس وكانت هتموت وحاجات كتير.. أمي مرتبطة بيا زيادة عن اللزوم وانا كمان».

واستطردت: «ماما وبابا كانوا بيحبوا بعض جدًا.. ولحد دلوقتي فيه بينهم احترام.. ووالدي من عائلة كبيرة جدًا.. مثقف ومتعلم تعليم عالي.. وطباخ كويس جدًا، الأول كان الموضوع بالنسبة لي كره.. عشان كان موجود ومش موجود.. ولكني كنت شايفه إنه مش موجود بإرادته.. وإنه كان موجود وهو اللي مش عايز يكون موجود كانت تعباني نفسيًا».

بكاء منة فضالي

ظهرت منة فضالي تبكي على الهواء متأثرة بعلاقتها بوالدها، قائلة: «عمري ما حسيت أنه بيحبني نهائي، مع أني حاولت أقرب منه بس هو مساعدنيش، كان بعيد طول الوقت معرفش يمكن عشان متربتش معاه ومتعبش عليا، وعملت حاجات كتير عشان أقرب منه، مهما بتعملي بيكون الموضوع صعب، الحب والمشاعر محدش بيعلمهم لحد».

وتابعت: «ومن قريب كنت بعمل مسرحية في السعودية وهو عايش هناك وكلمته يجي يقعد معايا، ولقيت نفسي بقوم كل شوية مش عايزه أقعد معاه مش لاقيه حاجة أقولها، والمسرحية كان المفروض هيحضرها وأنا أتلهيت ونسيت أقوله بسبب المسرحية دايما كاملة العدد وقتها قولت لنفسي معقول أنسى أعزم أبويا، أنا بحب أبويا لأنه أبويا وبحترمه لكن مش زي أمي».

وأوضحت أن والدها كان سببًا في حزنها وانزعاجها عندما تقدم أول عريس لها وكان عمرها 21 عامًا، قائلة: «حسيت إن أبويا بيرميني وقال للعريس إحنا عايزين نجوزها بسرعة ومش عايزين منك حاجة خلينا نخلص!».

منة فضالي ووالدتها