منى زكي تكشف أسرارا لأول مرة: «فقدت 7 أجنة وبحاول أتعالج من الخوف»

كشفت الفنانة منى زكي سرًا لأول مرة عن معاناتها من إجهاض 7 أجنة، وإصابتها بمرض مناعي، وتحدثت أيضًا عن سر غياب أحمد حلمي عن تكريمها بمهرجان الجونة.

قالت منى زكي عبر تصريحات تلفزيونية: «بين لي لي وسليم 12 سنة، لأن أنا عندي مرض مناعي وفقدت 7 أجنة في الشهر الثالث في بدايات حملي وكنت بزعل جدًا لأن فيه تجارب منهم تلقيح صناعي ودي تجارب مؤلمة على أي ست، وفيه تجارب طبيعي ولكن الحمل بيقع».

معاناة منى زكي مع الإجهاض

وتابعت: «ولما بدأت أعالج المرض المناعي بدأ الحمل يكمل تاني وخفت أوي من ربنا أن دي حاجة كنت بتمناها في وقت تاني ولكن نعمة مش هقدر أفقدها.. واحتفظت بولادي وربنا يديني القوة».

وحسمت منى زكي الجدل حول غياب زوجها الفنان أحمد حلمي عن تكريمها خلال الدورة التاسعة من مهرجان الجونة السينمائي، قائلة: «مكنتش عارفة إن الموضوع هيثير التساؤل بالشكل ده، وزملائي كانوا بيوشوشوني هو حلمي مجاش ليه كأني مخبية حاجة، ولكن هو مسافر مع لي لي بيعمل لها حاجة علشان كده مقدرش ييجي».

تصريحات منى زكي عن أحمد حلمي

وأكدت تقديرها الكبير لمساندة أحمد حلمي لها على مدار سنوات زواجهما، مضيفة: «جوزي معطاء ودايمًا بيساندني، ولو قعدت أعد هو ساندني ووقف جنبي في حاجات كتير أوي مش هعرف أقول عددها في حياتنا على مدار السنين دي».

واستكملت: «هو سندي وأبو ولادي وبني آدم فنان جدًا وبيقدر الفن بشكل عام وعنده مواهب متعددة وعمرنا ما كان في منافسة بيني وبين أحمد، الراجل بيساندني طول الوقت وأنا بحاول أهيأ له كل الظروف يبقى مرتاح وهو بيشتغل، بنحاول نخفف عن بعض، وأنا اخترت الإنسان مش بمستوى النجومية وعمري ما فكرت هو هيوصل فين بشغله ولا إن الجوازة دي هتبقى برستيج».

نظرة منى زكي للمرأة

وتحدثت عن موقفها من بعض الصور النمطية المرتبطة بالمرأة، معلقة: «مبحبش الست المنكسرة واللي تعمل نفسها غبية ومش فاهمة، دي موضة أو طريقة تجذب ناس معينة ولكني مبعرفش حتى أقعد معاهم، والستات دي كذابة مش جذابة».

وقالت عن معايير اختيار أدوارها: «فاهمة إني كبرت، ومهم أوي تستوعبي إنتي في أي مرحلة زمنية من عمرك، علشان متقدميش حاجة مش مناسبة لعمرك ومتحسيش بيها، ودلوقتي لما يجيبولي دور في أوائل الأربعين بقولهم أنا مش في أوائل الأربعينات والأحاسيس دي مبقتش عندي، الواحد بيتغير وحاجات تانية اللي بتبقى مؤلمة».

وأضافت: «إحنا في جيل اتولد كأنه اتبستر، وفجأة بقى في زمن مرعب شوية بعد الطيبة اللي عيشتها مع الجيل اللي قبلي، وعيشنا فترة الخوف مسيطر علينا.. بخاف من حاجات كتير وشغلتنا قائمة على أننا ننول الرضا واستحسان الناس.. وبحاول أتعالج من الخوف».