منى زكي عن فيلم رحلة 404: لم أتوقع تصنيفه للكبار فقط وكنت خايفة من الستات

كشفت الفنانة منى زكي تفاصيل جديدة عن فيلم رحلة 404 بعد نجاحه الكبير عقب طرحه بالسينمات منذ أيام، موضحة أن العديد من المنتجين رفضوا العمل.

وقالت منى زكي عن فيلم رحلة 404 في تصريحات تلفزيونية لها: «الفيلم مصنف للكبار فقط ومكنتش متخيلة إنه يصنف +18 يعني قولت ممكن 16+ ومن أول يوم وأنا حباه ومش شايفة إنه فيه حاجة وحشة».

منى زكي فيلم رحلة 404

وتابعت: «بالعكس حابة الفلسفة اللي وراه، وبعد ما صورنا شوية من الفيلم بدأت أفهم إزاي الناس ممكن تطلعك على المسرح فقلقت شوية وإحساس إنك تقرف من شخصية غادة في الفيلم، ولازم نفهم إن إحنا مش ربنا، وكل البني أدمين بتغلط وليهم أخطاء حسب نسبة الخطأ».

وردت منى زكي على سؤال: «هل المرأة التي لها ماضي يحق لها فرصة ثانية في الحياة؟»، وقالت مازحة: «لا موتوها.. أنا مع إن البنى آدم ياخد فرصة واتنين وتلاتة، ربنا غفور ورحيم وعظيم، والبني آدمين ليس لهم الحق أن يحاسبوا غيرهم».

منى زكي

تصريحات منى زكي

واستكملت: «كنت خايفة من الستات بسبب الدور، ولكن رأيت العكس وتعاطفوا مع الشخصية.. وهاني خليفة جابلي الورق في 2011 وكل ما نقرر نعمله المنتجين كانوا بيقولوا ده مش فيلم جماهيري، ومش هيعجب الناس فنعمل مشاريع تانية ونرجع تاني ندور على منتجين، وتقريبًا لفينا على كل المنتجين، والرد كان إنه مش هيعجب الناس، وفي الآخر محمد حفظي هو اللي تحمس للفيلم».

وتابعت حديثها عن تجربة فيلم رحلة 404: «أكتر حاجة طمنتني هو وجود أستاذ هاني خليفة، وعمرك ما هيجيلك إحساس إنك تقرف من شخصية غادة.. ومكنتش متوقعة أن الفيلم ينزل ويعمل إيرادات كتير، وقصة أني أعمل فيلم من بطولتي في السينما دي حاجة مبتجيش كتير لسيدات اللي بتمثل، فلما بصدق أن الفيلم يجيلي ودوري فيه حلو ويعجب الناس بعمله، والحمد لله ربنا كرمنا كرم كبير في رحلة 404».

منى زكي

منى زكي وأحمد حلمي

وتحدثت الفنانة منى زكي عن دعم زوجها الفنان أحمد حلمي لها، معلقة: «مفيش زي أحمد ولا حنية أحمد.. من زمان حابب الفيلم أوي وكان فرحان به جدًّا وكان شايف إنه هيعمل حاجة ويوم العرض الخاص للفيلم، أحمد قعد يقولي هتشوفوا الفيلم هيعمل حاجة وهيجيب فلوس كويسة».

واختتمت: «مفيش زي أحمد حلمي في حبه ليّ ودعمه المتواصل من بداية المشوار ومن وقت ما اتجوزنا».

منى زكي