من خريج سياحة وفنادق إلى التشرد في الشارع.. قصة شاب عشريني تهز السوشيال

تسيطر حالة من التعاطف الواسع على مواقع التواصل الاجتماعي بعد انتشار مقاطع فيديو لشاب يُدعى عبد الرحمن، خريج كلية السياحة والفنادق، يبلغ من العمر 23 عامًا، ظهر فيها وهو يفترش أحد شوارع القاهرة، بعد إصابته الخطيرة في يده، حيث ناشد الجميع مساعدته لتلقي العلاج وإجراء عملية جراحية عاجلة.

وقال عبد الرحمن: 'عايز أعمل عملية في إيدي ومحدش عايز يعملها لي، كنت نازل أشتغل وعربية داست على إيدي، والدبلة لسه في إيدي، وعايز عملية ومحدش عايز يساعدني في فلوس العملية، بنام في الشارع عشان مليش حد، وأهلي في البلد، حسبي الله ونعم الوكيل فيهم'.

وأضاف: 'بكلم حبيبتي بس من أي سنترال وبساعد نفسي وبلم كراتين وزجاجات، والعملية محتاجة دكتور جراحة، ياريت حد يساعدني في مسكن للألم'.

وتابع: 'أنا كنت قاعد جنب محطة مصر ونايم هناك وعربية ميكروباص داست على إيدي'.

وبسؤاله عن والديه قال: 'بابا وماما منفصلين، وعندي 3 أخوات بنات، وأنا نزلت اشتغلت، وكنت نايم عند محطة مصر، وأنا نايم راح الميكروباص دايس على إيدي'.

وأشار إلى أنه خريج سياحة وفنادق، قائلًا: 'أنا خريج سياحة وفنادق وبنام في الشارع، وبعد ما العملية تتعمل عايز أرجع بلدي تاني، كل اللي نفسي فيه سكن وشغل وأعمل العملية'.

واختتم قائلًا: 'أنا عايز أشتغل عشان أساعد إخواتي البنات وأحطهم في عيني، وحسبي الله ونعم الوكيل في الظالم'.