مودي سعيد يكشف كواليس أغنية صح صح: اتكتبت لبهاء سلطان ووصلت للعالمية مع نانسي عجرم

تحدث الملحن مودي سعيد عن نجاح أعماله، وشعوره بتعرض الملحن للظلم رغم نجاح الأغنية.

قال مودي سعيد عبر تصريحات إذاعية: «الملحن دايمًا مظلوم، وأغنية صح صح لنانسي عجرم كسرت الدنيا ووصلت للعالمية بس النجاح بيروح للمطرب أكتر».

وتابع: «وأنا بفرح لما الأغنية بتنجح حتى لو ما اتكرمتش عليها، وكانت خطوة مهمة وفارقة في حياتي وحياة نانسي عجرم، والأغنية كان اسمها سهرة صباحي، وفي الأصل كنت عاملها لبهاء سلطان ولما اتأخرنا عن تنفيذها بعتها لمطربين آخرين واتغير فيها كتير وكانت من نصيب نانسي عجرم في النهاية».

وأضاف الملحن مودي سعيد: «جيجي لمارا ماحطش أغنية صح صح في ألبوم نانسي، وساعتها زعلت فقالي إنه محضر لي مفاجأة لما عمل تعاقد بتوزيع الأغنية مع مارشملو وشركة يونيفرسال وطارق مدكور».

واستكمل: «بعشق حميد الشاعري ومصطفى قمر وفارس وإيهاب توفيق، وشايفهم نجوم في حتة تانية، حميد الشاعري صوته رهيب ومبدع وقدم جيل كان له بصمة فارقة، وكان متنوع في ألبوماته كلها ومفيهاش تكرار أبدًا وعنده دايمًا فكر جديد وعرف يعمل نقلة في شكل الأغنية، وعامل له لحنين آمل هينزلوا قريب».