ميمي جمال: حسن مصطفى طلقني عشان الغيرة.. ورجعني بسبب «الشال»

تحدثت الفنانة ميمي جمال عن علاقتها بزوجها الفنان الراحل حسن مصطفى وسبب انفصالهما بعد سنوات عديدة من الزواج.

ميمي جمال تتحدث عن زوجها حسن مصطفى

قالت ميمي جمال في تصريحات تلفزيونية: 'كنت زميلة حسن فى فرقة سيد بدير لمسرح التليفزيون، وكنت في الوقت ده مخطوبة لضابط وكان عايزني أبطل تمثيل، قالى أنا مستنيكي تخلصي تمثيل وبعدين نتجوز لأن أنا ظابط مينفعش تبقى مراتي ممثلة وقتها حصلتلى كسرة، وكنت بعمل مسرحية مطرب العواطف، وكنت بحكى ليه على اللى حصل معايا ، وكان والدى متوفى من وأنا صغيره ، وكان بيحكى لى على كل حاجة وهو كان متجوز وعنده بنت'.

واستكملت حديثها، وقالت: 'سيد بدير جه قالى على حسن طالما بتحبوا بعض طيب ما تتجوزوا، فأنا قولتله لأ ازاى هو متجوز وعنده بنت، فقاله سيد بدير شوف مراتك وبنتك هتعمل معاها ايه وبعد كده نشوف، وبعد كده طلق مراته لأن فى مشاكل بينهم كتير، وماما كانت رافضه الجواز لأنه أكبر مني، وكان وكيل وزارة فى التربية و التعليم وكان ماسك المسرح المدرسي، وأنا ضغطت على ماما واتزوجته وقولتلها احنا هنشتغل احنا الاثنين ونكبر مع بعض'.

سبب طلاق ميمي جمال

وعن سبب طلاقها ، قالت ميمي جمال: 'حسن كان بيغير عليا بدون ما يحسسنى، ومرة فى مسرحية دورى مى فاصوليا، كنت لابسة سواريه، وواحدة زميلة ربنا يسامحها، قالتله مش شايف ميمى بتلبس ايه فى المسرح، فلقيته داخل عليا المسرح وبعد العرض قالى انتى على طول بتلبسي كده لازم الفستان يتغطى بشال، وكنت مزنوقه فى العرض وملحقتش اجيب الشال وهو عرف اني ما لبستهوش وقالى كده مش هينفع نكمل مع بعض؛ لأنى قولت حاجة وانتي ما نفذتيهاش، بعد ٣٠ سنة جواز، وساب البيت وبقى يبات عند سمير خفاجة، وأنا عملت الشال للفساتين، وكلمت سمير يقوله ميمي عملت اللى انت عاوزه واتصالحنا وحسن مكانش عنده نزوات ومكنش بيعمل حاجة غلط وأنا كنت بثق فيه'.