مي عز الدين بعد غياب: لسه الوجع موجود وياسمين عبدالعزيز اتخانقت معايا عشان أرجع

كشفت الفنانة مي عز الدين الكثير من أسرارها وتحدثت عن فقدان والدتها، الذي مازالت متأثرة به حتى الآن.

قالت مي عز الدين عبر تصريحات تلفزيونية: «مش حابة أتكلم عن رحيل والدتي.. ومفيش حد بيتجاوز أهله بس أنا رجعت للشغل وخرجت وصيفت وروحت الساحل وده يعتبر حدث بالنسبة لي لأني في العادة مبحبش أروح الأماكن الزحمة، لكن الوجع موجود لسه زي ما هو».

سبب ابتعاد مي عز الدين

وفيما يخص سر ابتعادها عن الظهور الإعلامي لسنوات، علقت قائلة: «بقالي 6 أو 7 سنين معملتش أي برنامج.. أنا من النوع اللي لو مش حاسة بالحاجة مش بعملها، واللي بيراقب تصرفاته يقدر يعرف هو شغوف بإيه».

كما تحدثت مي عز الدين عن صداقتها القوية بعدد من نجوم الفن، من بينهم الفنان أحمد السعدني، الذي يعد أقرب أصدقائها، معلقة: «أحمد السعدني هو صديقي المقرب، لكن الشغل معاه متعب لأنه عكسي تمامًا».

وتابعت: «ياسمين عبدالعزيز كانت حنينة عليا أوي، قعدت تنصحني وتقول لي لازم تشتغلي، هتعرفي، لازم تحاولي، واتخانقت معايا، بعدها بأسبوع جالي قلبي ومفتاحه وافتكرتها».

عودة مي عز الدين للعمل

وقالت عن عودتها للعمل وكواليس مشاركتها في مسلسل قلبي ومفتاحه: «كنت موجودة جسديًا لكن مش ذهنيًا، والأستاذ تامر محسن كان سند كبير ليا في الفترة دي، افتكرت كلام أمي وقدرت أشتغل، وآسر كان ساندني أوي ومتعاون معايا جدًا، ودياب وأستاذة عايدة وأستاذ أشرف وكل الكاست كان داعم، والأساس في كل ده أستاذ تامر محسن، كان سند كبير أوي ليا في الفترة دي».

وأضافت مي عز الدين لتتحدث عن تأثرها بالنجوم الكبار، قائلة: «كنت بتفرج على نجوم مهمين يعني الفرجة على عبلة كامل لوحدها بالدنيا، مدرسة إحنا مفتقدينها جدًا لكني أكثر حد مبسوط ليها لأني فاهمة يعني إيه تعيش في سلام نفسي وخصوصية، فهي قوية من غير استعراض لا بلبس ولا بمكياج ولا بسوشيال ميديا، شخصيتها هادية وبتتكسف جدًا، عكس اللي بنشوفه على الشاشة.. وأستاذ أحمد زكي ونبيلة عبيد مدرسة وتفاصيل كتير، كل ما تتفرج كويس كل ما تلاقي نفسك مخزن في ذاكرتك تفاصيل وطريقة، والعمل مع يسرا كان خطوة فارقة وتعلمت منها الكثير، ليس فقط على مستوى الأداء، بل على مستوى التعامل الإنساني أيضًا، أما الزعيم عادل إمام علمني ووقف جنبي كتير جدًا، وكرّمني، وعرفني على أسرته زوجته وأولاده محمد ورامي أنا ووالدتي في بيته، وبعدها كلمني وبارك لي وجالنا تصوير دلع بنات وكان فرحان بينا جدًا وقال لي إنتي عاملة شغل حلو».

وقالت عن حياتها الشخصية: «عشت طول حياتي في مصر الجديدة ولسه موجودة فيها في شقة، والحاجة الوحيدة اللي ممكن أكون محتاجاها هي أرض علشان أزرع فيها، وبحب الزرع قوي ودي هوايتي بعد التمثيل».