مي عز الدين: بكيت في أول لقاء مع زوجي.. واعترف بحبه في الهاتف وتزوجنا يوم السناجل العالمي

كشفت الفنانة مي عز الدين أسرار زواجها من أحمد تيمور، وتفاصيل بداية علاقتهما، كما تحدثت عن الأزمة الصحية الصعبة التي مرّت بها وفقدان والدتها.

وأوضحت مي عز الدين عبر تصريحات تلفزيونية موقفها من فكرة الأمومة، قائلة: «سايبة موضوع الخلفة لربنا تمامًا، سواء ولد أو بنت كله رزق، ومش بضغط على نفسي أو بخطط للموضوع ده».

معاناة مي عز الدين

وتحدثت عن معاناتها الصحية ونقلها للمستشفى، وقالت: «عشت أسوأ لحظات حياتي وأنا لوحدي في العناية، وكنت مجهزة نفسي لأسوأ السيناريوهات وكان تامر حسني بيتابع حالتي ويزورني في المستشفى حيث كانت بين الحياة والموت».

وعن وفاة والدتها وفترة مرضها، قالت مي عز الدين: «قعدت 15 يوم أروح المستشفى لماما أنادي عليها هي في غيبوبة.. بس ماكانتش بتسمعني.. وفي آخر يوم توفت، وعلاقتي بأمي عمرها ما كانت سيطرة، دي كانت صداقة، كانت صاحبتي أوي أكتر من إنها أم».

وتابعت: «وحسيت بوحدة شديدة بعد رمضان فقررت أكسر عزلتي وأحضر حفلة للموسيقار عمر خيرت رغم إني مش من هواة حضور الإيفنتات، والمخرج تامر محسن هو المنقذ اللي ظهر في أكتر لحظة سوداوية في حياتي، وطلب مني أنزل أشتغل فورًا في مسلسل قلبي ومفتاحه».

كواليس زواج مي عز الدين

وفيما يخص كواليس زواجها، قالت: «وأبويا ربنا يديله الصحة ويخليهولي.. كان فرحان يوم كتب كتابي أوي لأن كان نفسه يشوفني عروسة، واتجوزنا يوم 11/11، ولما عرفت إنه يوم السناجل العالمي ضحكت جدًا، دي كانت صدفة بحتة وتفائلت بالرقم ومكنتش أعرف المناسبة دي أصلاً».

وعن تفاصيل تعارفهما وأول لقاء بينهما، علقت قائلة: «بكيت لما سمعت أغنية عارفة لعلي الحجار ووقتها أحمد كان قاعد جنبي بالصدفة إداني منديل وحاول يهديني، واتعرفنا وقاللي إنه دكتور صيدلي وتغذية من إسكندرية وبدأ يدردش معايا عن نظامي الغذائي الغلط، وحطلي خطة تغذية وتابع معايا وبقينا أصدقاء بنتكلم باستمرار لمدة 4 شهور وفعلا خسيت على إيده، وفي آخر شهرين، العلاقة اتحولت لارتباط وأحمد هو اللي اعترف بحبه الأول في مكالمة تليفون وكنت خايفة ومترددة في البداية من سرعة الأحداث، وقررنا نتجوز فجأة وبسرعة بعدما لقينا إننا متفاهمين جدًا».

وقالت مي عز الدين عن مميزات زوجها: «حسيت إن زوجي ربنا بعتهولي في التوقيت ده حكمة منه، عشان يعوضني عن إحساس الوحدة اللي كنت عايشاه، وأول إنسان يرجعلي إحساسي بالأمان هو جوزي، بيعرف يحاوطني ويهتم بكل تفاصيلي، تصرفاته دي مكنتش بتصدر غير من والدتي، وزوجي شخصيته قريبة مني جدًا، بيحب جو العيلة، حنين، وبيهتم بتفاصيل حياتي، وده وفرلي الونس اللي بدور عليه، وأنا ماعرفش أخش المطبخ إلزام.. لو حسيت إني لازم أطبخ كل يوم مش هعرف أعمل ده».

واختتمت: «زوجي شخص رياضي جدًا، بيروح الجيم يوميًا، وأكله الأساسي دايمًا صحي عبارة عن فراخ مشوية وخضار سوتيه، وأنا زيه مبقيتش أسيب الجيم».