مي كساب: الظروف مخدمتنيش في الغناء ومكنتش عايزة أكون ممثلة

كشفت الفنانة مي كساب أسرار عن حياتها الشخصية والفنية وبدايتها، بجانب كواليس ابتعادها عن الغناء، قائلة: «الظروف مخدمتنيش في الغناء».

تصريحات مي كساب

قالت مي كساب في تصريحات تلفزيونية لها: «اللي عارفين يكملوا من جيلي لازم الجمهور يتأكد إن دي اجتهادات فردية منهم، وكل شركات الموسيقى مبقوش يشتغلوا، حتى المنتج نصر محروس مبقاش يشتغل زي الأول.. أنا قررت وقت ثورة 25 يناير أني مش هشتغل تاني لايف، وجابوني في مسلسل تامر وشوقية من أغنية شيل ده من ده».

وتابعت: «مكنتش عايزة أكون ممثلة وأحمد الفيشاوي ومكي هما اللي اختاروني في تامر وشوقية، ودخلت مجال التمثيل عشان أرضي والدي وهو كان شايفني خليفة شادية، وعادل إمام كان حاببني في فيلم بوبوس».

مي كساب بعد فقدان الوزن

مي كساب وعادل إمام

واستكملت مي كساب حديثها عن تعاونها مع الزعيم عادل إمام: «كنت 24 ساعة معاه وهو أبو الكوميديا، واتعلمت منه أقول الإفيه أمتى وإزاي ويسرا ست عظيمة قدرت تواكب كل جيل، اتعلمت منها إنسانيًا وبتجبر بخاطر كل الناس اللي حواليها وهي مثال للنجم الحقيقي».

وقالت أيضًا: «فيلم شمال يا دنيا عملته عشان محتاجة فلوس وهناك أعمال قدمتها عشان الفلوس بعد ثورة يناير ولما قالولي مش هينزل في السينما كنت في قمة سعادتي، وفيلم 8% بيحكي عن المهرجانات ودخلت العمل ده عشان أعرف عالم المهرجانات، وخرجت من الفيلم ده الناس كلها بتجري ورايا في السينمات وكانت شخصية أزعرينا قالبه الدنيا، ومش ندمانة على دوري في الفيلم مهما كانت عيوبه».

أعمال مي كساب

وعن أبرز الشخصيات المقربة لقلبها التي قدمتها، علقت قائلة: «شخصية شفق هانم في مسلسل سرايا عابدين من أكتر الأدوار اللي بحبها والمخرج عمرو عرفة من المخرجين الغاليين على قلبي وكان مؤمن بيا».

وعن مسلسل جعفر العمدة وأبطاله، قالت مي كساب: «زينة صديقة ليا من زمان قبل ما نتشهر وهي محترمة وبعتز بصداقتها لكن في أغلبية التصوير هي مكنتش بتكون معانا فيه عشان كده مفيش حاجة بتجمعنا بيها لكن مفيش مشاكل بينا، ومسلسل جعفر العمدة كان نجاح ساحق خصوصًا اللي حصل في الشارع المصري والعربي وهو تفاعل الجمهور معانا».

مي كساب