ناهد السباعي: «السادة الأفاضل» عمل جماعي ومفيش دور كبير أو صغير

حلت الفنانة ناهد السباعي ضيفة على برنامج "الصورة" الذي تقدمه الإعلامية لميس الحديدي عبر قناة النهار، وكشفت خلال اللقاء عن كواليس مشاركتها في فيلمها الجديد "السادة الأفاضل"، مؤكدة أن التجربة تمثل لها محطة مهمة في مشوارها الفني.

وقالت ناهد السباعي: "فيلم السادة الأفاضل مكتوب صح، والعمل جماعي، ومهما زادت مساحة الأدوار أو قلت، الحكاية كلها متشابكة مع بعض صح، وعمر أهمية الدور ما كانت بمساحته، لكن بقيمته. الفيلم مش لفنان بعينه، لكنه عمل جماعي متميز، وكل فنان ليه تأثيره، ولو ماكنتش هأثر ماكنتش شاركت، فالدور مش بحجمه لكن بقدر تأثيره في تضفيرة العمل".

وأضافت: "من ضمن أمنياتي اللي اتحققت في الفيلم إني أشتغل مع المخرج كريم الشناوي، لأنه بيحب الممثل وبيخليه يحس إن دوره أهم دور، وأنا ماحستش إن دوري صغير أو كبير، لأن الفيلم أحداثه بتدور في وقت قصير جدًا ومكان واحد، فمفيش حد دوره صغير أو كبير لأن الكل مشارك في الحدث الأساسي".

واستكملت حديثها قائلة: "من أصعب أيام التصوير إننا كنا كلنا بنستلم من بعض ونسلم لبعض، حد داخل وحد خارج، وكنت سعيدة جدًا بكمية الفنانين اللي شاركوا، دخلنا البروفة وشوفنا بعض، جالنا حالة انبهار وكنا بنقول لبعض: إيه ده! إحنا مع بعض في نفس الفيلم".