نجل نعيم عيسى: مفيش حد من الوسط الفني عزانا أو سأل عنه في مرضه

أعرب نجل الفنان نعيم عيسى وأسرته من استيائهم بسبب معلومات مغلوطة عن الراحل، ويتم تداولها على السوشيال ميديا.

قال نجل نعيم عيسى في مقطع فيديو نشره عبر قناة باسم الراحل على موقع الفيديوهات يوتيوب: «إحنا حبينا نطلع النهاردة أسرة الفنان الكبير نعيم عيسى.. حبينا نقول كلمة بسبب إن فيه حاجات على السوشيال ميديا ولغط وبعض المعلومات الغلط الموجودة.. فحبينا نطلع نوضح بعض النقط كدة».

تصريحات نجل نعيم عيسى

وتابع: «الله يرحمه له محبين كتير وجمهور كان بيحبه وناس كتير كانت بتحبه والحمدلله ناس طلعت في جنازته كتير.. بالنيابة عن الأسرة وعائلة نعيم عيسى إحنا بنشكر جمهوره وبنشكر كل محبيه، وبنشكر كل الناس اللي دعت له أثناء مرضه وبعد وفاته، ولسه بيدعوله لحد دلوقتي».

استكمل نجل نعيم عيسى: «وبطالب كل محبيه يكملوا في الدعاء، وإن شاء الله يصيبه هذا الدعاء، وربنا يجعل مرضه في ميزان حسناته اللهم اغفر له وأرحمه.. عايز أوضح للناس بصراحة مفيش أي حد من الوسط الفني كان بيسأل عليه أثناء مرضه رغم كان له أصدقاء من الوسط الفني، وكان بيحبهم، مفيش حد عزانا خالص».

أسرة نعيم عيسى

وأضاف: «الدكتور أشرف زكي نقيب المهن التمثيلية نقيب الإنسانية.. ماسبناش من أي مرضه وكان على تواصل معانا دايمًا يوميًا، وبعد وفاته كلمنا وحتى لو محضرش الجنازة بنفسه، لكنه بعت عضو من مجلس النقابة أنا بشكره والأسرة كلها بتشكره».

وقال أيضًا: «محدش جالنا ولا عزانا.. إحنا بكل بساطة كان يهمنا الناس اللي بتحبه، والناس كانت كتير في جنازته وده يكفينا، وإحنا كأسرة متفرقش معانا حضور فنانين.. وفيه مذيع مشهور عمل معاه لقاء من حوالي 3 سنين، والمُعد وقتها شرح لوالدي إن الحوار هيكون ماشي إزاي، لكن المذيع وجه الحوار في اتجاه آخر، أنا كنت حاضر التصوير وطلبنا بإن هذا الجزء يتلغي، ولكن الإعداد بيحب التريند فنزلوا الجزء ده، وبعد وفاته نزلوه تاني».

واختتم نجل نعيم عيسى: «وده مضايقنا كأسرة لأن هو كان مضايق والدي من قبل، سايب الحديث كله وبتبتز الجزء اللي دفعته يقوله!.. والجزء ده إحنا رافضينه نهائي وبطالب المذيع المشهور جدًا لو سمحت الجزء ده اللي بيضايقنا إحنا كأسرة إنه ميطلعش تاني.. أثناء الجنازة تعرضت شقيقتي ابنة نعيم عيسى لإغماء وبعض المواقع صورتها أنها زوجة الفنان الراحل، وهذا موضوع ضايقني شوية أرجو نراعي مشاعر الناس في السوشيال ميديا».