نجوم الفن يروون ذكرياتهم في العيد.. اللمة والعيدية ورسالة خاصة للشهداء

روى عدد من نجوم الفن ذكرياتهم مع العيد، في فيلم تسجيلي تم عرضه ضمن احتفالية عيد الفطر 2024 بحضور الرئيس السيسي وأسر وأبناء الشهداء.

تحدث نجوم الفن عن ذكرياتهم في العيد، واجتمعوا على خبز الكحك واللمة والعيدية، وحرصوا أيضًا على توجيه رسالة للشهداء وأبنائهم.

ذكريات نجوم الفن في عيد الفطر

قال الفنان أحمد حلمي: «أحلى حاجة في العيد اللبس الجديد والمراجيح على شكل مركب وكنا زي أي بيت مصري بنعمل الكحك والبسكويت والصاجات السوداء الكبيرة والصغيرة والملونة هو طقس بيجمع العائلة والعيال الصغيرة إننا نساعد أهالينا».

وتابع: «وتقف في صف العيدية وترجع وتلف تقف تاني علشان تاخد العيدية مرتين.. العيدية كانت من أهم الحاجات في العيد وكنا بنستناها من السنة للسنة وكنت بتضايق إنهم بيدوا العيدية أول يوم بس كان نفسي تكون الـ 3 أيام كنا زمانا النهاردة مكونين مستقبلنا».

ووجه أحمد حلمي رسالة للشهداء، قائلًا: «لولا الشهداء مكناش هنبقى هنا النهاردة بننعم بالأمن والأمان ونعيّد وإحنا متطمنين.. عيد سعيد عليكم يارب كل أيامكم أعياد في أعياد».

أحمد حلمي

ذكريات الفنانين في العيد

وقال الفنان أحمد أمين: «كان لازم تجيب أي حاجة جديدة بيجامة أو كوفية أي لبس جديد ووقت لعب الكرة كنت أقف شنطة مش عارضة لسببين أولًا مليش في اللعب خالص ثانيًا لابس بيجامة جديدة فأنا عارف بعمل إيه.. وأحلى كحكة هي اللي كنا نسرقها من على الصينية وهي لسة طالعة من الفرن متفهمش جميلة ليه ويا سلام لو طلعتلك محشية.. ونقف صف بالبيجامات الجديدة والفلوس طالعة وعمو يدينا العشرة جنيه.. ونقول لكل شهدائنا هنفضل فاكرينكم.. كل سنة وإنتم طيبين».

وتحدثت الفنانة منى زكي عن ذكرياتها في العيد، قائلة: «لبس جديد ده كان لازم إحنا كبنات أعتقد دي حاجة أساسية وكنت بنبهر لما أشوف العيال بتلف بالمرجيحة لفة كاملة».

واستكملت: «ستات العيلة والعمارة كانوا بيتجمعوا وينقشوا الكحك والصواني رايحة جاية على الفرن وجدتي كانت بتعمل كحك في البيت وكان أحلى كحك ومن ساعنها مدوقتش أحلى من كحكها.. والعيد بالنسبالي أول كوباية شاي بلبن مع البسكويت»، مختتمة: «أولاد الشهداء أمانة في رقبتنا طول ما إحنا عايشين.. كل سنة ومصر طيبة».

أحمد أمين

منى زكي

تصريحات نجوم الفن في عيد الفطر

وقالت الفنانة منة شلبي عن ذكريات العيد: «كنت ببقى محضرة اللبس وجزمتي جنب السرير وفاكرة وإحنا قاعدين بننقش الكحك وأنا أول واحدة بتاكلها وهي سخنة»، وعن الشهداء قالت: «مقامهم في قلوبنا كبير جدًا.. كل سنة وإنتوا طيبين».

بينما تحدث الفنان ياسر جلال عن ذكريات العيد قائلًا: «كنا بننام نحلم إننا نصحى الصبح ونلبس الهدوم الجديدة .. أما العيدية أمي كانت عايزانا نحوش ورامز خد منها الحكاية دي.. وأول يوم العيد في الغدا كانوا يحبوا يغيروا ياكلوا فسيخ ورنجة وبصل أخضر أنا من الناس دي»، وقال في رسالته للشهداء: «بنفتخر بيكم .. كل سنة وإنتم طيبين».

وقالت الفنانة دينا الشربيني: «اللبس بيكون بايت في السرير وأفضل أبص له لحد ما أصحى علشان ألبسه.. وفاكرة شكل الصواني وهي رايحة جاية على الفرن، وكلنا قاعدين بننقش الكحك.. الشارع كله فرحان إن أول يوم العيد جه»، وقالت أيضًا في رسالتها للشهداء: «اللي ضحوا بأرواحهم وهما بيقوموا بواجبهم.. كل سنة وإنتم طيبين».

منة شلبي

نجوم الفن في عيد الفطر 2024

ومن جانبه، قال الفنان أكرم حسني: «بيبقى معروف إن ده لبس عيد مش لبس عادي وعمري ما سلمت العجلة في الميعاد بتاعها.. وإحساس لما تسقي البسكويت النشادر في الشاي له طعم وريحة مختلفة.. العيد بالنسبة لي صفاء أبو السعود واهلًا بالعيد.. كل سنة وإنتم طيبين».

وقالت الفنانة نيللي كريم عن ذكريات العيد: «العجلة أم كنبة ورا ولعب الكرة في الشارع والعيدية والفلوس الجديدة اللي ريحتها زي العربية الفبريكة»، مضيفة: «مصر هتفضل فاكرة كل أسامي أولادها الشهداء.. كل سنة وإنتم طيبين».

وروت الفنانة صابرين ذكرياتها بالعيد، قائلة: «اللي كان بيسوق العجلة هو الفرويد في المجموعة، وماما كانت تاخد العيدية مني وتقولي إحنا بنردها»، مختتمة: «كل أسرة عندها شهيد.. كل سنة وإنتم طيبين».

أكرم حسني

صابرين

نيللي كريم

احتفالية عيد الفطر 2024

وتحدثت الفنانة إسعاد يونس عن ذكريات العيد قائلة: «كنا نقف في الطابور ساعة علشان نحجز العجلة ربع ساعة وكنا نسرق كام كحكة من على الصينية وأنا كنت أرش السكر على الكحك وكنت أشيل العيدية والفلوس في الكراسة علشان تفضل الورقة مفرودة»، وقالت في رسالتها للشهداء: «أبطالنا شهداء الوطن.. بنقول لكل أولادهم كل سنة وإنتم طيبين وعيد سعيد».

وقال الفنان هشام ماجد: «جدتي أم والدي كانت تقعد على الأرض وتجيب الصاج الكبير وتقعد تخبز الكحك.. والعيد بالنسبالي لمتنا في بيت جدتي بعد صلاة العيد»، مختتمًا حديثه برسالة للشهداء: «حافظين جميلكم.. كل سنة وإنتم طيبين».

وقالت الفنانة صفاء أبو السعود: «ببقى فرحانة ومبسوطة وشيء يشرفني إن كل بيت بيبقى فرحان بأغنية أهلا بالعيد وأتمنى إن الأغنية تفضل في قلبكم دايمًا ومتتغيرش أحاسيسكم ودايمًا مستنيينها.. كل سنة وإنتم طيبين».

وتحدث الفنان أحمد عز عن ذكرياته بالعيد قائلًا: «أحلى حاجة في العيد لمتنا أهل وعائلة وأصحاب وجيران.. فيه سعادة وبهجة في كل حتة»، ووجه رسالة للشهداء وقال: «اللي ضحوا علشاننا وعلشان مصر وولادهم ولادنا .. كل سنة وإنتم طيبين».

واختتم الفيديو التسجيلي برسالة من الفنان محمد رمضان قائلًا: «وإحنا بنحتفل بالعيد النهاردة مش عايزين ننسى اللي بسببهم إحنا النهاردة بنعيد ومبسوطين ومتجمعين.. اللي ضحوا بروحهم فدانا وفدى أرضهم.. كل سنة وإنتوا في الجنة ونعيمها.. عيد سعيد وكل سنة ومصر طيبة».

أحمد عز

إسعاد يونس

صفاء أبو السعود

محمد رمضان

هشام ماجد