نجوى فؤاد: جيت على مصر ومعايا 10 جنيه ورفضت أتجوز وأنا عندي 13 سنة

كشفت الفنانة الكبيرة نجوى فؤاد عن حالتها الصحية الحالية وبعض الأسرار من مشوارها الفني الطويل، مؤكدة أنها تمر بوعكة صحية تستعد لإجراء عملية جراحية بسببها خلال الأيام المقبلة.

وأوضحت نجوى فؤاد في مداخلة هاتفية مع الإعلامية نهال طايل، ببرنامج "تفاصيل"، المذاع عى قناة صدى البلد، قائلة: "والله أنا الحمد لله أحمد ربي وأشكره، بس أنا تعبانة فعلًا، عندي فقرة في ضهري لازم تتعمل لها عملية إن شاء الله بعد 10 أيام، وعندي تآكل في ركبتي الشمال واليمين كنت حاطة مفصل فعمره الافتراضي خلص وملتهب عامل التهاب في رجلي كلها".

وتحدثت نجوى فؤاد عن مسيرتها الفنية التي جعلتها من أبرز رموز الرقص الشرقي في العالم العربي، قائلة: "أنا كان ليا ستايل تاني خالص يعني، وكان من عند ربنا موهبة مكنش يعني، آه اتمرنت شوية باليه مع نيللي مظلوم، آه اتمرنت مع القومية شوية استعراضي، ده تنمية لنفسي شوية، تدعيم لنفسي، ولكن أنا موهبة موجودة منذ الصغر، لذلك رفضت الدراسة ورفضت إن أنا أتجوز وأنا صغيرة، أبويا كان عايز يجوزني وأنا عندي 13 سنة فرفضت، جيت على مصر هنا معايا 10 جنيه بس مكنتش عارفة أعمل إيه".

واستعادت ذكرياتها قائلة: "أنا إسكندرانية، وأمي فلسطينية الله يرحمها ماتت وأنا عندي 7 شهور".

وعن بداياتها في عالم الرقص وكيف فرضت نفسها رغم الصعوبات، قائلة: "عشان أستمر في الرقص كان ممنوع إن أنا أخش أي محل فيه كحول أو فيه أي حاجة، معنديش ولي أمر، فاضطريت أتجوز أحمد فؤاد حسن؛ لأنه كان أستاذي وعلمني ووقفني على أرض صلبة، لكن اتجوزته وأنا صغيرة أوي واتعملي شهادة تسنين عشان خاطر أتجوزه وأقدر أشتغل".

كما تطرقت إلى بداياتها وسط جيل من عمالقة الرقص الشرقي مثل تحية كاريوكا وسامية جمال، قائلة: "أنا كنت مرعوبة مش خايفة، الخوف والرعب فرق كبير، لكن أنا هقولك على حاجة، أنا لما بدأت هما كانوا عمالقة الرقص الشرقي وقتها".