نصائح ياسمين عز: «الدمياطي عينه مش زايغة..والمنوفي بينور الست»

ياسمين حمادة 28 يناير 2023 | 09:45 مساءً

وجهت الإعلامية ياسمين عز مجموعة من النصائح الجديدة للسيدات عن الزواج وأنواع الرجال، قائلة: «الست اللي تتجوز من دمياطي ست محظوظة».

نصائح ياسمين عز للسيدات

تابعت ياسمين عز في تصريحات تلفزيونية لها: «عشان ربنا كرمها براجل حتة سكرة، وذهنه دايمًا حاضر وإفيهاته جاهزة، وقادر يخرج زوجته من أي مود وحش.. الدمياطي ملوش في اللف والدوران».

وعن مميزات الرجل الدمياطي، قالت الإعلامية ياسمين عز أيضًا: «ومستحيل يكذب أو يحور عليكي، ولو في يوم حس إنه غلطان في حقك معندوش أي حرج يعتذر ويطيب خاطرك، والراجل الدمياطي دايمًا يحسس مراته إنها ست خارقة ومهمة جدًا».

تصريحات ياسمين عز

واستكملت قائلة: «دايمًا يفخم ويعظم فيها بمناسة وبدون مناسبة، مجرد ما تسلقي بيضتين أو تحمري شوية بطاطس لجوزك الدمياطي، هيقول فيكي قصائد شعر ولا كإنه بيفطر في أوتيل 5 نجوم».

وقالت ياسمين عز أيضًا: «ولو إنتي سايقة العربية وهو قاعد جنبك، في كل ملف أو مطب تلبسيه هيحسسك إعجابه بسواقتك، وأجمل وأهم ميزة إنه مخلص وعينه مش زايغة».

ياسمين عز والزوج الدمياطي

ومن المميزات التي طرحتها عن الزوج الدمياطي: «يعتمد عليه ومعروف إنه كسيب، تلاقي معاه شهادة عليا ورغم كده ممكن يتعلم صنعة للزمن، وتلاقيه الصبح مهندس وبالليل استورجي، أو الصبح موظف بنك وبليل أسطى نقاشة، إيده عمرها ما تبقى بطالة ومكفي طلبات بيته كلها».

واختتمت: بيعرف يقيم الناس كويس، لأنه طول وجوده في الورشة بيشوف ناس كتير، وده معناه إنك تقدري تاخدي رأيه في أي موضوع وإنت واثقة من صحة تقييمه».

ياسمين عز والزوج المنوفي

أما عن الزوج المنوفي، قالت: «يا هناكي ويا سعدك لو إتجوزتي راجل من المنوفية، راجل عاقل ورزين مش أي واحدة تعجبه أو تملا دماغه، وخليكي عارفة إن زواجك من المنوفي إنجاز في حد ذاته لأنه أخذ قراره بعد أيام طويلة من التفكير والتمحيص والدراسات والمباحثات».

وأضافت ياسمين عز كلامها: «لحد ما توصل إنك الست اللي تستحق يكمل حياته معاها، ومعروف للجميع إن المنوفية بلد الكرم كله، وهتلاقي جوزك المنوفي كريم معاكي ومعطاء، وكل اللي في جيبه ليكي ولولادك، واعرفيها قاعدة المنوفي لا يلوفي مع صفة البخل، ومقولة الراجل هو اللي بينور الست مقصود بيها الرجل المنوفي».

الإعلامية ياسمين عز

وتابعت: «لأنه بينور الست ويخليها تشع وتشعشع، راجل قلبه كبير وعقله يوزن بلد، ويفهمك من غير ما تتكلمي، لو كل الرجالة مع المنوفي في كيس، هتخاري المنوفي عريس، ومن سرس الليان لمنوف المنوفي الجدع تطلعيه من وسط ألوف».

واختتمت الإعلامية ياسمين عز: «ومن أشمون لشبين راجل عاقل ورزين، ومن الشهدا للباجور مخه كبير ويعرف يوزن الأمور، ومن قويسنا لتلا يا هلا بالمنوفي يا هلا».

ياسمين عز