نصيحة رنا سماحة لأهالي طلاب ثانوية عامة: متجلدوش ولادكم وهونوا عليهم

حرصت الفنانة رنا سماحة على دعم طلاب ثانوية عامة بعد ظهور النتيجة لعام 2024، كما وجهت نصيحة لأسر الطلاب.

وقالت رنا سماحة عبر حسابها بموقع التواصل الاجتماعي فيسبوك: 'جماعة بمناسبة نتيجة الثانوية العامة، انا في ثانويه عامه كنت بدأت اكتشف نفسي كفنانة فكان كل همي المسرح والمزيكا كنت عايشه في المسرح مكنتش حتى بروح المدرسه كتير وبالمناسبه الفتره هي الاساس في تكويني الفني ومن اسباب وجودي النهاردة'.

وتابعت: 'مكنتش مهتمه بالدراسه ف جبت ٥٢٪؜ بالعافية ودي كانت اول مره ف حياتي اوصل للنتيجه دي لاني كنت دايماً من المتفوقين وبالمناسبه انا في ثانويه عامه كنت امينة المدرسه ومقرر فني على مستوى الاداره، المهم اني دخلت المعهد العالي للموسيقى العربيه'.

وأضافت رنا سماحة حديثها، وقالت: 'بدأت طريقي الي مكمله فيه للنهارده، مكانتش نهاية العالم ولا هتبقى نهاية العالم اياً كانت نتيجتك، دور على الحاجه الي بتحبها وبتبدع فيها مش لازم كلنا نبقى دكاتره ومهندسين صدقوني'.

ووجهت رنا نصيحة للأهالي، وقالت: 'نصيحه للأهل متجلدوش ولادكم وهونوا عليهم مش هتفرح لو ابنك حصله حاجه عشان طلع بماده مش نهاية الكون'.

وأختتمت كلامها: 'ادعمه وشجعه يدور على نفسه وهدفه، وفي النهايه بتمنى النجاح والتوفيق ليكم جميعاً وكل الي نفسه ف حاجه يحققها، ملحوظه انا اختي معاها بكالريوس اداب اعلام صحافه وهي اصلا مكانتش ثانويه عامه'.