«دخلت السينما عن طريق زوج أختي.. ومكنتش لاقية أدوار أعملها في رمضان اللي فات».. بهذه الكلمات روت برنسة عبدالغني المعروفة بـ «أشهر كومبارس في السينما المصرية»؛ تفاصيل حياتها الشخصية ودخولها إلى مجال السينما.

وأوضحت برنسة عبدالغني خلال لقائها مع الإعلامية نهال طايل مقدمة برنامج «تفاصيل» المذاع على قناة صدى البلد 2، أنها بدأت العمل في مجال السينما عن طريق زوج شقيقتها، حيث كان يعمل دوبلير للفنان الكبير رشدي أباظة، مشيرة: أول دور عملته في حياتي كنت طالعة صامتة في فيلم فجر الإسلام مع الفنانة سلوى إبراهيم، ولما بدأت اتكلم؛ بدأت في فيلم صايع بحر وكابتن هيما.

وتابعت: أول مخرج قالي إني هتكلم كان المخرج الكبير أشرف فهمي، واشتغلت مع معتز التوني، وكاملة أبو ذكري، وقمت بعمل أعمال كثيرة غامضة، وأخذت أجر 2000 جنيه في اليوم في فيلم الحريفة السنة دي، ومفيش حد بينافس حد في مجال التمثيل، كل واحد له لونه وشكله وأداءه.

أعمال برنسة عبدالغني السينمائية

وأكملت برنسة عبدالغني: اشتغلت الموسم ده في فيلم الحريفة والقاهرة باريس، ومشتغلتش في موسم رمضان اللي فات لأن محدش طلبني، واتصلت بناس كتير قالولي لما تيجي حاجة مناسبة هنكلمك، ومحدش كلمني، وفاطمة كشري وليلى الإسكندرانية رحمة الله عليها من أعز أصدقائي.

وأردفت: اشتغلت حاجات كتير أوي واشتغلت بتاعة ملابس لفنانين كتير، واشتغلت في الطبخ وتخصصت في الأكل الشرقي والغربي، وسافرت أماكن كتيرة، وعملت 12 حج وعمرة قبل كده ونفسي أروح عمرة دلوقتي.

وعن علاقتها بالفنانين من الوسط الفني الحالي، أشارت برنسة عبدالغني، إلى هناك بعض الفنانين يقومون بتقديم مساعدات كثيرة لها، ومنهم الفنانة وفاء عامر، والفنان ياسر جلال والفنان أحمد العوضي، لافتة: حورية فرغلي ونرمين الفقي وعبلة كامل وسلوى خطاب من الفنانات الجُمال.

واختتمت برنسة عبدالغني في حديثها مع الإعلامية نهال طايل: مش عاوزه أشحت من حد وبحب أتعب عشان أحلل القرش اللي بأخذه، واللي بيطلعوا يعملوا فيديوهات على التيك توك دول بيشحتوا ومبحبش اللي بيعملوه.