نهال طايل عن شيرين عبد الوهاب: «بنحبك.. ورغم الأزمات ستظلين نجمة الوطن العربي»

أكدت الإعلامية نهال طايل، على مكانة النجمة شيرين عبد الوهاب، كأحد أبرز نجوم الغناء في مصر والوطن العربي، وذلك عقب الجدل الذي أثير حول حفلها الأخير بمهرجان موازين في المغرب، وحالة الجدل بين جمهورها على السوشيال ميديا.

وأشارت نهال طايل، خلال حلقة اليوم الإثنين، من برنامج 'تفاصيل'، المذاع على قناة صدى البلد 2، قائلة: “شيرين فنانة فريدة، لأن تقدر وأنت ماشي راكب عربية فارهة، مشغّل أغاني شيرين، وأنت رايح مشوار واخد توك توك، تلاقيه مشغّل شيرين، ما تفهمش هي بتعملها إزاي!، لو بتطّلع أوتيل 7 ستار، تلاقيها موجودة بأغاني، بحفلات، بأفراح، ولو نازل فرح في مكان بسيط خالص، تلاقيهم بيشغّلوا شيرين؛ لأنها قريبة وجميلة'.

وأضافت نهال طايل، أن أغاني شيرين القديمة لا تزال تعيش رغم مرور السنوات، قائلة: 'شيرين أغانيها القديمة جميلة، عايشة، وقليل لما أغاني قديمة بتعيش في الزمن ده، مش بتكلم على جرح تاني بس، بتكلم على متحاسبنيش، وعلى بالي، مشاعر، كتير بنعشق، بتمنى أنساك، كلها أغاني عايشة مع الناس'.

وأكدت نهال طايل، على أن الفن مهنة قاسية، والجمهور يظل طماعًا في فنانه المفضل، يريد النجم دائمًا بأفضل حالاته، مضيفة: 'بنحبك يا شيرين، اللي حصل ده ولا عمل أي حاجة عندنا، الجمهور طماع لأنه بيحبك وعايزك في أحسن حال'.

وأشارت نهال طايل، إلى أن المنافسة أصبحت شرسة في الوسط الفني، قائلة: 'مبقاش في حد طيب أو حنين، وكل اللي بينافس حد عايز يقطّعه، ليه؟ مش عارفة، غير مفهوم'.

وعلقت نهال طايل، على تصريحات محامي شيرين بشأن مقاضاة أي تدخل سلبي، أوضحت أن مثل هذه التصريحات طبيعية لحماية النجوم الكبار، قائلة: 'أنت مش بتتكلم عن نجمة صاعدة، أنت بتتكلم عن ميجا ستار زي شيرين، وشيرين لو عندها أزمة، فهي أزمة عاطفية لأنها مرهفة الحس، وده سر إنها بتدخل قلوبنا'.

واختتمت الإعلامية نهال طايل رسالتها قائلة: 'أنا بحب شيرين، وبعتبرها من أهم مطربات الوطن العربي، ويمكن تكون أولهم، رغم كل أزماتها ستظل شيرين.. ممكن بمقطع غنائي واحد وهي متسلطنة تصالح جمهورها كله، اللي هو مش عارف هو زعلان ليه، احنا بقينا قاسيين على بعض'.