نهى عابدين: بمنع ابني عن السوشيال ميديا وطفولتي مكنتش أسعد حاجة

كشفت الفنانة نهى عابدين أسرار من حياتها الشخصية، وكواليس لأول مرة من مسيرتها الفنية.

قالت نهى عابدين عبر تصريحات تلفزيونية، إنها لم تخضع لأي عمليات تجميل لأنها تخاف، مضيفة: «أنا بخس وأتخن وكنت عاوزة أمثل فسيبت كلية الآداب عشان أدرس حاجة بحبها».

تصريحات نهى عابدين

وتابعت: «كل ست وعندها أولوياتها وأهم أولوياتي إن الراجل يحترمني ومش لازم اتحكم فيه ويتحكم فيا ومش لازم يمشي بمشورتي، نحترم بعض، زوجي من حقه يتدخل في الأدوار التي تُعرض عليا ولكن بحدود وإيه سبب التدخل ونتناقش مش يكرهني في الدور ولو شاكك فيا روح لواحدة غيري».

كما تحدثت نهى عابدين على بدايتها من خلال برامج مقالب، معلقة: «أما عملت برنامج المقالب كنت مستمتعة به وأكثر حاجة شجعتني إني أعمله إني هقوم فيه بـ 30 شخصية في 30 يوم وأنا أما بعمل دور في أى مسلسل بيكون دور واحد ولو جاتلي دلوقتي مقالب مش هينفع لأن في وقتها كان أنسب وقت لها مكنتش معروفة».

نهى عابدين

طفولة نهى عابدين

وقالت عن طفولتها: «مكنتش أسعد حاجة ومبحبش أتكلم عنها، والدي توفى وأنا عندي 5 سنين، ولو كان موجود ممكن مكنتش دخلت مجال التمثيل أبدًا لأنه راجل صعيدي وأنا كنت المدللة بتاعته، وساعات كتير كنت ببقى محتاجة حضنه، ووجود الأب في حياة البنت بيبقى مهم جدًا بيقويها سند وضهر».

واستكملت نهى عابدين: «أنا كبيري ربنا وفي البني آدمين ابني كبيري وبعمله حساب في كل حاجة، وبنيت لوالدي صورة وشخصية على حسب الـ 5 سنين اللي عشتهم معاه، أنا والدي من سوهاج وعشت واتربيت في الإسكندرية ومارحتش سوهاج غير مرتين وبقالي 12 لـ 14 سنة في القاهرة عشان شغلي».

زواج نهى عابدين

وقالت عن زواجها: «زواجي استمر 4 سنوات ومش فاكرة اتطلقت امتى، ممكن أفكر في الجواز تاني والمهم عندي طباع الشخص، وأهم حاجة عندي الكرم».

وأضافت نهى عابدين: «علمت نفسي مؤخرًا إني أما أحب أعمل حاجة مابقولش ولما حد بييجي عليا بدعي عليه وعمر ما حد جه عليا وكسب وأنا مبحبش أجيب في سيرة الناس واللي يجيب في سيرتي منه لله، ولم أطلق شائعة اعتزالي الفن واللي مصدق براحته، ومعروف عني إني عصبية لكن بطلع وبنزل على مفيش».

وتابعت حديثها عن أدوار الإغراء: «من يوم ما اشتغلت حتى النهاردة بركز في دوري فقط، ومبحبش التصنيفات في أنواع كوميدي تراجيدي وأنا ست بشتغل ممثلة، فيه أدوار أقدر أعملها وفيه أدوار مقدرش أعملها ومينفعش أطلع أزايد على زملائي اللي بيعملوا أدوار أنا مقدرش أعملها، ودي قدرات نفسية يمكن أنا اللي معنديش الإمكانيات».

واختتمت نهى عابدين: «بمنع ابني عن السوشيال وروحت لدكتور نفسي بسبب الضغوط».

نهى عابدين

نهى عابدين