نهى عابدين: خدت قرار الاعتزال بسبب الخيانة ووالدتي مش متواجدة معايا

أعربت الفنانة نهى عابدين عن سعادتها بالمشاركة في مسلسل شهادة معاملة أطفال، ضمن موسم دراما رمضان 2025.

قالت نهى عابدين عبر تصريحات تلفزيونية: «محمد هنيدي إضافة كبيرة ليا هو دمه خفيف وذكي جدًا متعرفش هو بيهزر ولا إيه وفي مزاولة بيننا ومبسوطة في التعامل معاه»، لافتة إلى أنه من أقرب الأشخاص لها في العمل.

تصريحات نهى عابدين

وتابعت: «إحنا عايشين في الدنيا نتعلم ونركز ونشوف والكثير من الناس اتعرض للخيانة ومش شرط تكون الخيانة زوجية ممكن تكون صديق وفي النهاية العتاب غلاوة، أنا فيه فترة في حياتي عانيت من الاكتئاب، وكان بسبب تراكمات من المشاكل مهنية وشخصية، واتصدمت من ناس قريبة مني بسبب خيانتهم ليا، وفي الفترة دي خدت قرار الاعتزال، لأني كنت في حالة وحشة وبعدين تراجعت عنه، وأنا من الشخصيات اللي مبحبش أطلع أسراري على الملأ».

وقالت نهى عابدين أيضًا: «الخيانة مش شرط تكون بين راجل وست، الخيانة ممكن تكون من صديقة قريبة، وتبقى أبشع ما يكون، وأنا لما أعاتب حد ده معناه إنه غالي عندي، وأفضي اللي جوايا معاه عشان أعرف أكمل معاه، وكانت واحدة صاحبتي قريبة مني جدًا، وضربتني في ضهري جامد وبوظتلي حياتي».

أسرار نهى عابدين

وفيما يخص وفاة والدها وهي في سن مبكر وقرارها بالاستقلال عن والدتها، أشارت إلى أن والدها توفى وهي في الخامسة من عمرها، ووالدتها من تولت تربيتها.

واستكملت نهى عابدين: «عشت طفولتي مع والدتي حتى سن 21 سنة ومجيئي إلى القاهرة لدخول معهد السينما، ووالدتي مش متواجدة معايا خالص، لكن بتحبني أكيد وأنا بحبها».

وأضافت: «أخذت قرار أدرس في مكان غير اللي عشته وتربيت فيه، وبقى لي حياتي المستقلة.. ممكن أكون أنا اخترت البعد، لكن أنا مختارة حياتي تمشي بنظام معين.. أنا حبيت أعيش حياتي بشكل معين يريحني، وأنا والدتي مش زعلانة مني، ولا أنا زعلانة منها خالص.. مش مقررة أبعد ولا هي تبعد، طريقة حياتنا مختلفة عن بعض، ممكن يكون ده اللي بعدنا عن بعض لكن مفيش زعل ولا خلاف خالص».

كما كشفت سبب غيابها عن الجزء الثاني من مسلسل العتاولة، أوضحت أنها تتعامل مع الأمر بشكل طبيعي ولا تشعر بأي استبعاد متعمد، مختتمة: «الدور اللي قدمته في الجزء الأول خلص خلاص، فطبيعي لا أكون موجودة في الجزء الجديد، وليس شرط أن يكون فيه مؤامرة أو سبب شخصي لاستبعادي، المخرج مكلمنيش ولا حتى اعتذر لي، لكن الموضوع ليس مؤثر بالنسبة لي».

نهى عابدين