نورهان: أنا بحب الأدوار الجريئة بشرط ميكونش فيها حاجات لا أخلاقية.. فيديو

تحدثت الفنانة نورهان عن رؤيتها لاختيار الأدوار الفنية، مؤكدة أنها تميل إلى الشخصيات التي تحمل رسائل إيجابية وقيمًا أخلاقية.

وقالت خلال مداخلة هاتفية مع الإعلامية نهال طايل في برنامج 'تفاصيل' المذاع على قناة 'صدى البلد2': ' أنا بحب الأدوار الجريئة وبفضلها ومش هنكر ده، ولكن أنا عندي بعض الأعمال زي مثلاً مسلسل 'حالة عشق'،  وفي مسلسلات تانية زي 'اللغز' وغيره. عندي تجارب كنت بعمل فيها الأدوار الجريئة، بس عايزين نفرق ما بين الجريئة وما بين اللاأخلاقية'.

وأضافت: 'أنا جريئة جدًا وبحب الأدوار الجريئة بس ميكونش فيها حاجة لاأخلاقية، وأكيد بحب إنه يبقى عندي قماشة تبين حجم الموهبة وعندي من التنوع ما يسمح إنه النقاد والفنانين والفاهمين يقولوا إن نورهان موهبتها قماشتها واسعة'.

وتابعت: ' أنا لا أنكر إني أميل إلى الأدوار الدافئة أكتر، لأنه برضه ممكن كتير من زمايلنا الفنانين ميبقوش عندهم الرأي ده، ولكن أنا أزعم إنه ده الأفضل من وجهة نظري لتوظيف سلاح الفن.

وأوضحت: 'الفن سلاح والموهبة سلاح والكاريزما والقبول سلاح، فأنا شايفه إني لما بعمل الأدوار دي أنا بكسب حاجة وبضحي بحاجة، الحاجة اللي أنا بكسبها إني بسن سنة جيدة ممكن اللي يشوفها تلهمه إنه يتصرف نفس التصرف، أو اللي يشوفها يقول يا سلام الأخلاقيات دي مبقتش موجودة يا ريتها ترجع، أو يبقى متردد ما بين اختيارين في حياته أو في مفرق طرق في حياته فلما يشوف ده يقرر إنه ياخد الاختيار الأفضل، أو واحدة تشوف نفسها فيا في نفس ظروفها أو ظروف الشخصية اللي أنا بعملها'.