نور التوت يهاجم حمو بيكا: «بيديني ملاليم وليا الحق في أرباح اليوتيوب».. فيديو

هاجم مؤدي المهرجانات نور التوت، نظيره حمو بيكا، بعدما اكتشف أن قناة اليوتيوب الخاصة بهما حصدت أرباح تتخطى الـ 200 ألف دولار، بعدما حققت مليار و80 مليون مشاهدة.

وأوضح نور التوت في مداخلة هاتفية، مع الإعلامية نهال طايل، ببرنامج تفاصيل المذاع عبر قناة صدى البلد 2، قائلاً: «احنا كنا فرقة مكونة من 4 أفراد، حمو بيكا وعلي قدورة وفيجو الدخلاوي ونور التوت، وزاد علينا اخواتنا حسن شاكوش وعمر كمال، وهم كانو اضافة لينا عشان نحقق الارقام دي واحنا كنا إضافة ليهم، والرز بتاع ربنا وهو كاتب لكل واحد نصيبه».

وكشف نور التوت تفاصيل خلافه مع حمو بيكا قائلاً: «قناة اليوتيوب متأسسة بقالها 8 سنين، وبقالنا 6 سنين بنزل عليها شغلنا اللي هو وداع يا دنيا وداع، وانا حبيتك وجرحتيني، وحب عمري نسيني وفاتني، وكل الأغاني كانت بتنزل عليها، وحمو بيكا كان بياخد الأرباح ويقسمها علينا».

وأضاف نور التوت قائلاً: «من شهرين جبت حد بتاع سوشيال ميديا، وقالي القناة دي واخد منها كام؟، قولتله حاجات بسيطة، والقناة دي بتاعتي أنا وحمو بيكا وهو اللي ماضي في الشركة على عقود القناة، وكان حمو بيكا هو المسئول عن الفريق وأي شركة هو اللي بيمضي معاها، واحنا في الأخر بناخد نصيبنا ومبنبقاش عارفين حاجة، وكنت أنا من 5 سنين سني صغير».

وأشار نور التوت، إلى أن حمو بيكا ليس معه تفويض بالنيابة عنه، قائلاً: «هو معهوش تفويض لأي حاجة، احنا كنا 8 سنين مع بعض بناكل ونشرب أيام الأغاني، وأنا عشت مع حمو سنين وأنا صغير، ويعتبر هو اللي مربيني بعد وفاة أبويا».

وأكد نور التوت على أن له أداء صوتي في أغنية «وداع يا دنيا وداع»، والتي حققت 300 مليون مشاهدة على اليوتيوب، قائلاً: «اكتشفت أني باخد ملاليم الملاليم من حمو بيكا.. أنا مش واحد عايز يرمي بلاء أو ياخد التريند، أنا عايز حقي».