هاجر الشرنوبي تنتقد قانون الرؤية: مش منطقي الأب يشوف ابنه ساعة في الأسبوع

عبرت الفنانة هاجر الشرنوبي عن استيائها من قانون الرؤية الحالي، وطالبت بضرورة إعادة النظر فيه بما يحفظ حق الطفل في التواصل مع والده وعائلة الأب، مؤكدة إن "الطفل هو الأهم مش الصراع بين الأب والأم".

وجاء تعليق هاجر بعد صدور حكم المحكمة الدستورية العليا بشأن استرداد مسكن الحضانة بعد بلوغ الطفل السن القانوني، وكتبت عبر حسابها الرسمي على "فيسبوك": "بمناسبة حكم المحكمة الدستورية العليا لاسترداد مسكن الحضانة بعد السن القانوني، ده مش جديد، اللي محتاج يتعدل فعلًا هو قانون الرؤية".

وهاجمت هاجر القيود الحالية المفروضة على رؤية الأب لأطفاله، قائلة: "يعني إيه أب يشوف أولاده مرة في الأسبوع لمدة ساعة في مركز شباب؟! ويعني إيه الجد والجدة والعم والعمة وولاد العم مايبقاش ليهم حق يشوفوا الطفل؟".

وأكدت أن نظرتها للقضية نابعة من كونها "ست"، لكنها في نفس الوقت شايفة إن الطفل هو اللي بيدفع التمن، وأضافت: "قبل ما ندور على الست، وأنا ست وبتكلم، المفروض ندور على الطفل في الأصل. يمكن الرجالة مش عاملين حزب زينا علشان صوتهم يوصل، بس ده ظلم بيّن. من حق الطفل في سن التأسيس يعيش في حضن الأب والأم، مش يعيش يتيم وأبوه لسه عايش".

يذكر إن هاجر الشرنوبي شاركت في موسم رمضان 2025 بمسلسل "حكيم باشا" بطولة النجم مصطفى شعبان، وشاركها العمل نخبة من النجوم بينهم: رياض الخولي، سلوى خطاب، دينا فؤاد، منذر رياحنة، سهر الصايغ، ومحمد نجاتي.