هالة صدقي بندوتها بالأقصر: مبحبش الكآبة وبخاف من المخرجين الجدد وأهلي كانوا رافضين الفن

أنس سمير 05 فبراير 2023 | 01:15 مساءً

تحدثت الفنانة هالة صدقي، عن تفاصيل عديدة بحياتها وتجربتها الأولى مع المخرج نور الدمرداش، وصفة تتمتع بها اكتشفها الفنان محمد صبحي، وموقفها من المسرح.

وقالت هالة صدقي في ندوتها بمهرجان الأقصر للسينما الافريقية في دورته الـ 12: كان عندي هدف اني بحب التمثيل وعايزة أمثل ولما جاتلي الفرصة مع الأستاذ نور الدمرداش، وكنت بلعب وقتها سباحة وكان بيدور على واحدة بمواصفاتي، واتعرف عليا في النادي، فأقنعت أهلي اللي كانوا رفضين دخولي المجال إني أعمل عمل واحد بس وأشوف تجربتي والحمد لله نجحت وقاوحت.

وتابعت هالة صدقي: أنا حياتي بسيطة ومبحبش الكآبة والملكة دي اللي اكتشفها فيا الفنان محمد صبحي، وبشوف إن الممثل الكوميدي يقدر يعمل كل الادوار وأنا من القلائل اللي في جيلي عنده الملكة دي ويقدر يعمل النوعية دي، ولو معايا دراما سوداء هقدر أحولها بسهولة بالأداء وده حصل معايا في نص يا دنيا يا غرامي.

هالة صدقي: نفتقد في الدراما كتاب الكوميديا

وأضافت: نفتقد في الدراما كتاب الكوميديا، ولما بكون داخلة مع مخرج جديد أو مش عرفاه ببقى شوية مقفولة، ومتخوفة منه، واحنا بقالنا كتير بنقول على عمل جزء ثاني من يا دنيا يا غرامي وحاسة إن الورثة هم اللي هيعملوه مش احنا.

هالة صدقي: أموت وأشتغل مع الأستاذ محمد صبحي

وأوضحت: أنا عاشقة للمسرح وبحب المسرح جدا وفي الفترة الاخيرة جاتلي عروض كتير، ولكنها مش مسرح بل اسكتشات، واحنا لازم يبقى فيه شوية تنظيم للفرق المسرحية اللي بتعرض في البلاد العربية لأنهم بيحملوا اسم مصر، مضيفة: أنا أموت واشتغل مع الأستاذ محمد صبحي.

مهرجان الأقصر يكرم هالة صدقي

كرم مهرجان الأقصر للسينما الأفريقية فى دورته الـ12 المقام حاليًا بمعبد الأقصر، الفنانة هالة صدقى.

هالة صدقي قالت خلال تكريمها : مبسوطة بالتكريم وسعيدة بوجودى فى أعظم وأغنى مكان فى العالم أتمنى طبعًا السنة الجاية تكون فى أفلام مصرية مشتركة أكتر ومهرجان الأقصر من أهم المهرجانات ومهرجان مهم وله قيمة ومهم سياحيًا وفنيًا ومهرجان السينما مينفصلش أبدًا عن السياحة.