هاني عادل عن نهاية مسلسل لام شمسية: نداء ذكي وتعبيرا عن الفخر

علق الفنان هاني عادل على اختيار أغنية اسلمي يا مصر بدلًا من تتر نهاية مسلسل لام شمسية، الذي عُرض في النصف الثاني من شهر رمضان 2025.

كتب هاني عادل في منشور عبر حسابه الشخصي بموقع فيس بوك: «أجمل وأفضل نهاية لمسلسل خلانا كلنا نحس إن مصر فيها فن وفنانين يقدروا يعملوا حاجة مؤثرة في كل المجتمع لدرجة توحد الجمهور مع أبطال العمل وصناعه».

تعليق هاني عادل على نهاية مسلسل لام شمسية

وتابع: «كل الناس حبته وتفاعلت وحست وكمان الفنانين زملاء المهنة وأنا منهم اللي حسوا بالفخر بإن فيه زمايل وأصدقاء عملوا حاجة بالاحترافية ديه ومؤثرة كدة ومفيهوش تفصيلة معمولة باستعجال أو مش معمول حسابها والقصد من تأثيرها من بدري من وقت الكتابة وده اللي باين على الشاشة، النهاية كانت حلوة أوي أوي لأن القضية كبيرة وتخص كل الوطن».

واستكمل هاني عادل: «وجود السلام الوطني في نهاية المسلسل خلت المسلسل في مكانه الطبيعي كعمل فني مؤثر في كل الناس ونداء ذكي أنها قضية كبيرة مؤثرة وتعبيرًا عن الفخر بأنه عمل مصري خالص.. شكرًا لكل صناع لام شمسية

ومعلومة مهمة: الأغنية اللي أنا عملتها ده كان إهداء مني ومن فنانين شاركوا معايا للعمل وللقائمين عليه».

تصريحات هاني عادل

وأضاف: «وتعبيرًا عن تأثرنا بيه وفخرنا بيهم نشيد لام شمسية أتعمل بعد المسلسل كله ما خلص وأتسلم وكانت لفتة جميلة من صناع العمل أنهم ينزلوها على فيديوهات من المسلسل لحبهم للأغنية بعد ما سمعوها ولتقديرهم للمجهود اللي أتعمل فيها».

واختتم هاني عادل: «فأرجو إن ده ينفي تمامًا أي ربط بين الأغنية ديه ونهاية المسلسل اللي كانت متحددة ومعروفة من بدايه العمل على المسلسل واللي هي بكل تأكيد الأنسب والأهم وأنا فسرت ده ليه قبل كده ومكانش فيه أي مخطط نهائيًا لاستخدام أغنيتي في أي مشهد داخل المسلسل».