هاني محروس: شيرين عبد الوهاب مكنتش عايزة أغنية «على بالي» في البداية

كشف مهندس الصوت هاني محروس كواليس أغنية «على بالي» للفنانة شيرين عبد الوهاب، موضحًا أن شيرين لم تكن ترغب في تقديم الأغنية في البداية، قبل أن تعجب بها، ثم قدمت توزيعًا مختلفًا عن التوزيع الذي كان قد أُعد لها.

وقال هاني محروس خلال استضافته في برنامج «سبوت لايت»، الذي تقدمه الإعلامية شيرين سليمان على قناة صدى البلد: «شيرين عبد الوهاب مكنتش عايزة أغنية على بالي في الأول، وبعد كده حبتها، وبعدها عملت توزيع غير اللي إحنا كنا عاملينه».

وأضاف: «لما عرفت قولتلها لأ أنا مش حابب، وبعد إذنك يا شيرين، وهي كانت البداية للموزع الموسيقي أحمد إبراهيم، وهو كان عاملها حلو جدًا، ففجأة لاقيت الهوية بتاعتها بتبوظ».

وتابع: «أنا كانت الأغنية دي أنا اللي جايبها ومختارها، وأنا اللي عايش فيها، فكنت عايز تطلع زي ما أنا شايفها، والحمدلله كملت بالشكل اللي أنا عايزه».

وعن طريقة تعامله مع المطربين خلال العمل، قال هاني محروس: «أنا عادي باخد رأي المطرب لأن ممكن يبقى عنده وجهة نظر، فإحنا بناخد رأي بعض».