هدى المفتي تكشف علاقتها بأغنية ويجز وحقيقة خطوبتها لأول مرة

ردت الفنانة هدى المفتي على الشائعات المنتشرة بشأن ارتباطها، وكشفت أسرار من حياتها الشخصية والعملية.

قالت هدى المفتي عبر تصريحات تلفزيونية: «أنا عمري ما جالي عريس في حياتي كلها، لا قريب ولا غريب، مفيش راجل جه اتقدملي بشكل حقيقي يمكن بيخافوا مني ولا حاجة، كل اللي بيجيلي مسدجات على الفيس بوك والانستجرام».

تصريحات هدى المفتي

وأشارت إلى أن والدها كان يؤمن أن «الست مش محتاجة تتجوز إلا لو هي عايزة، مش لازم تتجوز عشان المجتمع»، مضيفة: «ماما كانت تقعد تقولي طيب يا هدى مفيش حد خالص؟!، وهي وبابا كانوا عكس بعض في مسألة الجواز دي».

وأوضحت هدى المفتي أن أول قصة حب في حياتها كانت في عمر الـ 17 عامًا، لكنها لم تكن موفقة على الإطلاق، بل شكّلت لها درس مؤلم غيّر من طريقة تفكيرها ونضجها العاطفي، وتابعت: «كانت أول علاقة في حياتي، لكن الخلافات والصراعات اللي كانت فيها أكبر مني ومنه، وأثرت عليا نفسيًا بشكل كبير، واتعلمت إن فيه حاجة اسمها احترام، ومسافات، وفيه حاجة اسمها أنا، وفي حاجة اسمها أنت، مش كل حاجة تبقى أنت بس».

وأكدت هدى المفتي أنها لا تود الحديث عن تفاصيل تلك العلاقة أو ذكر اسم الشخص، لأنها تجاوزتها نفسيًا بالكامل، وقالت إنها انتهت منها خلال شهرين ونصف فقط.

علاقة هدى المفتي بأغنية البخت

وكشفت الفنانة هدى المفتي لأول مرة علاقتها بأغنية البخت، قائلة: «الأغنية مش ليا، كان موقف غريب جدًا ويضحك، بداية الحكاية أن واحدة صاحبتي من الشلة بتاعة المدرسة القريبين مني ضيعت تليفونها اللي عليه صور وفيديوهات، كانت متوترة أوي وطول الوقت تليفوني ضاع واتسرق وعليه صورنا وإحنا صغيرين وإحنا في البحر، أنا كنت نايمة وعندي تاني يوم تصوير إعلان ولازم أصحى 6 الصبح وأنا نمت من 9، صاحية من النوم ببص في التليفون لقيت 300 حاجة وستين إشعار ونصهم على تويتر أنا كنت سامعة صوت قلبي ومش راضية افتح وعماله أفكر أنا عملت إيه وبعدين قلت أه تليفون صاحبتي ونزل صورة أو أي حاجة، بعدين قلت مش هفتح تويتر أنا هفتح انستجرام، لقيت رسايل كتير فتحت كان فيه صفحات حقوق المرأة وكاتبين (لو عايزة نتكلم في الموضوع) قلت في حاجة أكيد أنا ممكن ظهرت مع صحابي في فيديو قلت حاجة ولا لفظ مثلا وإحنا بنهزر، اترعبت».

وأضافت: «الشخص الوحيد اللي كان هيبقى صاحي هي حبيبة من فريق العمل بتاعي اللي كانت جاية معايا تصوير الإعلان كلمتها وسألتها في إيه راحت قالتلي في أغنية نازلة والناس كلها بتقول أنها متغنيالك، سألتها هل هو قال هدي قالت لي لأ قلت طب ليه الناس بتقول إنها ليا أنا، قالتلي اسمعي الأغنية لذيذة مكنتش قادرة اسمع الأغنية من كتر ما أنا خايفة، وبعدين دخلت اتفرج أشوف مكتوب إيه، بس الاغنية مش ليا خالص، ومش عارفة ليه الناس نسبوها ليا نفسي أعرف مين طلع الإشاعة دي إحنا كنا بنصور مع بعض مسلسل بيمبو وعلاقتنا كويسة نعرف بعض إحنا معارف ممكن نكون صحاب بس مش مقربين وحوالينا أصدقاء مشتركين كتير ونعرف بعض كويس وأنا بحترمه جدا هو فنان موهوب».

واستكملت هدى المفتي: «ويجز فنان خطير وموهوب، بس أغنية البخت ملهاش علاقة بيا، وصحيت من النوم لقيت رسائل على انستجرام وإكس!، وبكرر للمرة التانية الأغنية مش ليا نهائي، وأنا وهو معارف بس، أصحاب قريبين مش أكتر».

وعن مواصفات فتى أحلامها، قالت: يكون ذكي، طموح، عنده شغف بشغله، بيحترم الأسرة ويدعمني ويقدّرني. عايزة نسهّل على بعض الحياة»، وشدّدت هدى المفتي على رفضها الكذب أو التصرفات التي تقلّل من شأنها.

واختتمت: «أنا عارفة إنه طالع عليا إشاعة إني اتخطبت أو هتخطب، بس دي مش صحيحة تمامًا.. لو اتخطبت هقول وأكيد مش هخبي، ونفرح كلنا مع بعض».