«هو اللي لقاني مش أنا».. كيف اكتشف الراحل هاني شنودة عمرو دياب؟

كشف الموسيقار الراحل هاني شنودة كيف اكتشف الفنان عمرو دياب، ومفاجأة في أول لقاء جمعهما.

قال هاني شنودة في لقاء تلفزيوني سابق، ببرنامج فنجان قهوة، على قناة صدى البلد: «الودن الموسيقية لازم، حلاوة الصوت لازم، البراعة في الأداء لازم.. عمرو دياب اللي لقاني مش أنا اللي لقيته».

وتحدث عن كواليس أول لقاء يجمعهما، قائلًا «كان عندنا حفلة لفرقة المصريين في بورسعيد، خلصنا الحفلة ورُحنا ننام في الفندق، لقيت واحد بيخبط على الباب، فتحت وأنا بالبيجامة.. قال لي عايزك دقيقة.. دخل الأوضة عندي وقال لي: "أنا عايز أبقى مطرب".. بعدما سمعني قلت له: اسمع ودنك كويسة، عربك كويسة، بتغني كويس، كل حاجة.. شكلك حلو.. إحنا دخلنا دلوقتي في موضوع التلفزيون، كل أغنية لازم تبقى متصورة، وفي ناس منجحوش لأنهم طلعوا في التلفزيون، بس أنت عندك مشكلتين أولًا إنك بتنطق بورسعيدي.. ثانيًا إنك قاعد هنا.. وراح مشي».

واستكمل هاني شنودة: «تاني يوم الصبح صحيت لبست نزلت، لقيت الفرقة كلها واقفة والأوتوبيس اللي هياخدنا القاهرة واقف، وده واقف في وسطهم..قلت له: "أنت إيه اللي جابك هنا؟" قال لي: "ما أنا جاي معاكم مصر".. قلت له: "جاي معانا مصر؟ عندك حد تقعد معاه؟ عندك حد قرايبك؟".. قال لي: "أنت مالكش دعوة، أنا جايب المنتج بتاعي ومستنينا في مصر".. قلت له: "طيب اركب"».

وأضاف: «أظن كان عنده 20 سنة أو أقل سنة أو أزيد سنة.. عينيه فيها لمعة الستار.. أنا مش راجع بورسعيد تاني، أنا مش هرجع لحياتي الأولانية".. أنا اتوسطت له ودخلناه معهد الموسيقى العربية، وما كانش دارس موسيقى قبل كده.. واسمه الحقيقي مش عمرو بس آخره دياب ومقدرش أقول هو اللي يقول».

واختتم هاني شنودة: «جالي اتصال بيقول: "سايب المعهد وبيلعب كورة وهيتفصل".. رُحت مدينة السينما، قلت له: "يا عمرو أنت سايب المعهد وبتلعب كورة؟".. وكان فيه واحد بيضطهده لأنه كان مليان، صحفي بيكتب: "عمرو يأكل كموج البحر".. وقال لي: "أنا بعمل عمرو.. فخدته في حضني بقى، عرفت الولد ده هيوصل، لأنه كان بيلعب رياضة وبيلعب كورة عشان يخسس نفسه».