هيثم نبيل يرد على تصريحات عمرو مصطفى: متطلعش الزملاء حرامية ولو شايف إنها حرب قدر زمايلك

انتقد الفنان هيثم نبيل تصريحات الفنان عمرو مصطفى الأخيرة، التي هاجم بعد عدد من زملائه بسرقة ألحانه، بجانب انهيار الصناعة.

هيثم نبيل وعمرو مصطفى

قال هيثم نبيل في مقطع فيديو نشره عبر حسابه الرسمي بموقع فيس بوك، إنه يحب عمرو مصطفى ويحترمه لكنه يرد على ما يقوله في البرامج التلفزيونية.

قال هيثم نبيل في رسالته لـ عمرو مصطفى: «أنا عامل الفيديو ردًا على صديقي الفنان اللي بحبه عمرو مصطفى عندي تحفظ على تصريحاته الفترة الأخيرة على الزملاء وعلى شكل الفن».

وتابع: «أنا تحليلي للموضوع أن عمرو مصطفى عز فترة نجاحاته كانت كل الناس بتشوف إيه اللي ينجح وتجري وراه، الأغنية اللي تنجح كل المطربين يقفوا في طابور واحد وعاوزين نفس النجاح، مش عايزين يعملوا نجاح مختلف، لكن في آخر 10 سنين حصل تغيير في الأجيال».

هيثم نبيل

تصريحات هيثم نبيل

واستكمل الفنان هيثم نبيل: «وبقى في تنوع في الأذواق ودي حاجة صحية مش مضرة، وطول عمرنا بنشوف برا عندهم تنوع كبير وكل نوع من الأنواع له جمهوره، أنا كنت بغير جدًا أن برا في التنوع دا، ودلوقتي بقى عندنا في مصر أنواع كتيرة من الموسيقى مختلفة».

وأضاف: «وفي الآخر بيحصل تنقية كل حاجة جديدة الناس بتسمعها فترة وبعدها بتنقي، كون أن أحنا نتخض من اللي حصل ميقولش أن الصناعة بتنهار دي حاجة صحية، وبالعكس دي أكتر فترة نجاحات لمطربين كتير في مصر وبرا مصر، إزاي الصناعة منهارة وأحنا شايفين أن مثلا أحمد سعد بيغني من فترة كبيرة ودلوقتي في عز نجاحاته».

وقال هيثم نبيل أيضًا: «والهضبة ومحمد منير وتامر عاشور ورامي صبري وتامر حسني كلهم ناجحين وبيتم استقبالهم في الخارج بشكل كبير، كون أن أنا في الفترة الأخيرة مش مشارك في النجاحات دي مش معناها أن الصناعة وقعت، وتاني حاجة تصريحات الاتهامات وأن عمرو مصطفى قال إن رامي صبري سرق منه أغنية يمكن خير».

رد هيثم نبيل على تصريحات عمرو مصطفى

ورد هيثم نبيل على تصريحات عمرو مصطفى بشأن الاتهامات بالسرقة، وقال: «في حاجة اسمها سرقة وفيه توارد أفكار، رامي فنان تقيل وعنده أغاني كتير ناجحة ومش الأغنية دي اللي هتصنع وتفرق في مشواره، ورامي مش فنان قليل عشان يسرق عمرو مصطفى دي حاجات بتحصل، ولو هنتكلم بالمفهوم بتاع عمرو مصطفى أنه بيتكلم عن الذوق العام مش المفروض أن طول عمرنا نغني لأم كلثوم وعبد الحليم».

وتابع: «لأن الأغاني اللي أنت قدمتها وأحنا حبيناها هي مش سيرة الحب، الحرب اللي بتحاربها عن فكرة ذوق الناس المفروض تدعم كل الناس متطلعش الزملاء حرامية، لو شايف أنها حرب قدر زمايلك وكلنا ندعم بعض، لكن عن نفسي مش بشارك في الحروب دي لأن كل نوع فن بيتقدم ليه ناسه وجمهوره».

وكتب هيثم نبيل في منشور آخر: «خناقة واتهام علي ألحان من الأساس ليست لعمرو مصطفي يعني لو هننسبها لحد فهي في الأصل يا غايب ليه ما تسأل لفضل شاكر اللي ملحنها غير معروف.. وده حبيبي أغلى من عمري لعمرو دياب لحن عمرو دياب .. و دي ليالي كنت بحلم بيها في خيالي لأنغام لحن إيهاب عبد الواحد.. التقليل اليومي من الزملاء ده سبب الأجازة الطويلة والبرامج الكتير.. رامي صبري وتامر عاشور فنانين محترمين ومشرفين وتوارد الأفكار واردة خصوصًا إنها ألحان مش بالمازورة للجميع».

عمرو مصطفى

هيثم نبيل