وفاء صادق عن ذكرياتها مع والدها: أصعب المخرجين وطردني من الاستوديو

تحدثت الفنانة وفاء صادق عن أسرارها وذكريات بداياتها الفنية وموقف والدها المخرج الراحل عادل صادق.

قالت وفاء صادق عبر تصريحات تلفزيونية: «اتطردت من الاستديو مرة لما قلت له يا بابا، لدرجة إني مستوعبتش إيه الغلط في إني أقوله يا بابا، كان من أصعب المخرجين اللي اشتغلت معاهم».

ذكريات وفاء صادق مع والدها المخرج الراحل

وتابعت: «لأنه كان عنده حساسية أنه بيتعامل مع بنته فميتقالش أنها متدلعة أو بتشتغل عشان بنته، حتى في المعاملة كان ناشف معايا، وبابا مكانش موافق دخولي الفن خالص لكن مش من باب أن هو مش عايز بنته تمثل هو كان شايف إني متدلعة على المهنة، لأن المهنة دي عايزة حد ملتزم وجد ويقدر يتحمل المشقة بتاعتها لأن منظرها من برا يبدو أنها سهلة، وأنا كان عليا إني أثبت له إني قد المسئولية دي».

واستكملت وفاء صادق: «أول عمل كان مسلسل الطاووس من إخراج بابا الله يرحمه وقدمني في 7 مشاهد، قالي هو ده اللي ليكي عندي، اثبتي أنك قد المسئولية دي، هديكي الفرصة اللي ناس كتير تتمناها وريني بقى، وبعد كده جالك شغل جالك مجالكيش أنا عملت اللي عليا».

تصريحات وفاء صادق

واختتمت: «اتعلمت منه فنيًا أنا متربية في مطبخ الشغلانة من قبل ما اشتغل أرجع من المدرسة على الاستديو، كان بيقولي أساسيات المهنة اللي هي أنا الحقيقة دلوقتي مفتقداها جدًا، احترام المهنة عشان تحترمني وأديها قد إيه من وقتي واهتمامي واحترام الكبار اللي في المهنة مهم أن الممثل يبقى بيتفرج على قد ما بيشتغل».