وفاة الفنان تامر ضيائي بعد إصابته بجلطة في القلب

أعلن الفنان محمد علي رزق وفاة الفنان تامر ضيائي منذ قليل اليوم الأربعاء 17 يوليو 2024، بعد تعرضه لأزمة صحية وإصابته بجلطة ثم خضوعه لعملية جراحية في القلب.

وكتب محمد علي رزق في تعليقه على صور الفنان تامر ضيائي التي نشرها عبر حسابه الرسمي بموقع فيس بوك: «لا حول ولا قوة إلا بالله.. صديقي وأخويا الكبير عشرة عمري تامر ضيائي في ذمة الله».

وفاة الفنان تامر ضيائي

وتابع: «الله يرحمك يا تامر ويجعلك من أهل الجنة ويعوضك عن تعبك في الدنيا.. نسألكم قراءة الفاتحة و الدعاء له بالرحمة و المغفرة».

وكانت آخر أعمال الفنان تامر ضيائي مشاركته في مسلسل فراولة، ضمن موسم دراما رمضان 2024 الماضي.

الفنان تامر ضيائي

وصية تامر ضيائي

وفي مايو 2024، حرص الفنان تامر ضيائي على الكشف عن وصيته وذلك عقب تعرضه لجلطة خلال الأيام الماضية، وخضوعه لعملية جراحية في القلب.

كتب تامر ضيائي عبر حسابه بموقع التواصل الاجتماعي فيسبوك: 'بوست الوصية ده هيفضل باين على صفحتي لحد ما أموت.. الحقيقة إللي كلنا عارفينها ومتأكدين منها إننا كلنا ربنا كتبلنا إننا نموت في ميعاد محدد غير معروف، وعشان كده كتبت الكلام ده لأنى محتاج حاجات معينه تتعمل وحاجات خايف تتعمل وأنا مش عايز حد يعملها لمجرد إنها معروفه، ووقتها طبعًا مش هعرف أقولها لحد'.

واستكمل تامر ضيائي حديثه، وقال: 'دي وصيتي صلاة الجنازة أهم من العزا، وهى اللى كل ما العدد زاد كل ما ثوابى ما كان أكتر، فأرجوكم تصلوا عليا، مش شرط تيجى العزا وياريت لو إتعمل فى البيت أو مكان بسيط بفلوسه تطلعولى صدقة جارية أفضل، من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وإدعولى الوقت اللى هتقروا فيه جزء فضوا نفسكم وإقعدوا إدعوا فيه'.

وأضاف تامر ضيائي: 'بلاش صدقة جارية تقليدية وسهله ومش مستفاد بيها يعنى المصاحف كتير فى مصر اوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة، دى نقطة مهمه اوى بالنسبة ليا.. محدش يقول لحد بتعيط عليه لية، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجه بتقول إن العياط معناه عدم رضا بقضاء ربنا 'وأبيضت عيناه من الحزن فهو كظيم'.

واختتم تامر ضيائي حديثه، وقال: 'أهم حاجة تانى هى الدعاء وبس والصدقة، من فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبرى روضه من رياض الجنه ويثبتنى عند السؤال لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى، الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى، اللي بيحبوني يدعولى كتير عشان لو مفيش حد يدعيلى، ودى مهمة أوى أوى أوى عاوز الكل يسامحني علي اي حاجه عملتها فيه بقصد لو يدون قصد'.

مرض تامر ضيائي

وفي أبريل 2024، تامر ضيائي كتب في منشور عبر حسابه الرسمي بموقع فيس بوك: «بداية جلطة، دعواتكم».

وخضع الفنان لعملية قسطرة في القلب بعد أن تم إذابة الجلطة التي تعرض لها، وينتظر الأطباء الاطمئنان على حالته الصحية بعد إجراء بعض التحاليل الطبية ليتمكن من الخروج من المستشفى.

تامر ضيائي

تامر ضيائي