يارا السكري تكشف أسرارها من «الثلاجة الفاضية» إلى حلم الأمومة ومواصفات شريك حياتها

تحدثت الفنانة يارا السكري عن الظروف الصعبة التي مرت بها في طفولتها، لكنها جعلتها تتحمل أي موقف صعب.

قالت يارا السكري عبر تصريحات تلفزيونية: «كان عندنا صعود وهبوط في المستوى الاجتماعي كان بابا بتمر عليه ظروف في الشغل بيضطر يرجع لنقطة الصفر، في الطفولة كنا متعودين على حاجة معينة وكنا بنرجع لنقطة الصفر كانت ماما بتدربني من الأول أن متجبليش كل حاجة، بابا مبسوط بيا وبيحبني وعايز يجبلي كل حاجة، يجيبلي تليفون ياخده مني وتقولي مفيش تليفون في السن ده، وعايزة اشتري لبس العيد زي قرايبي، العيد 4 أيام عايزة 4 أطقم لبس كانت تجيبلي طقم واحد بس وأقولها هو أنا هلبس كل يوم نفس الطقم تقولي أه انتي اللي هتحليه مش اللبس اللي هيحليكي».

طفولة يارا السكري

وتابعت: «وقتها اشتريت جيب وسعرها بسيط وبلوزة عادية وعملت شعري، وكلهم لابسين لبس غالي حواليا، وخرجنا وكل الناس كانت بتقولي شكلك حلو أوي جايبه اللبس بتاعك منين وأنا أحس أنهم هيتريقوا عليا، تاني يوم محدش ياخد باله إني لابسه نفس الطقم بغير تسريحة شعري وشكلي ويبان أنه طقم تاني، من هنا اتعلمنا القناعة، المصروف بتاع المدرسة مكانش مصروف كبير تاخد الساندويتش ومصروف على القد، ولما حصلت لنا الظروف دي قدرنا أننا نعيش بالموجود كانت تمر علينا أوقات التلاجة فاضية لكن الناس تشوفنا كأننا ولاد ذوات».

وكشفت يارا السكري أصعب مشاهدها في مسلسل علي كلاي، وهو مشهد وفاة شقيقها الصغير في الحلقة الرابعة، مؤكدة أنه ترك أثر نفسي وجسدي كبير عليها، حيث استحضرت خلاله صورة شخص قريب منها بمثابة ابنها، ما أدخلها في حالة من الإرهاق الشديد، وصلت إلى ارتفاع درجة حرارتها وفقدان صوتها بعد انتهاء التصوير.

تصريحات يارا السكري عن الأمومة

وتحدثت عن رؤيتها للأمومة، موضحة أن مفهومها تغيّر، وقالت إنها تحلم بأن تصبح أم، معتبرة أن الأمومة مسؤولية كبيرة في تربية جيل قادر على مواجهة المجتمع.

وفيما يخص مواصفات شريك حياتها، قالت: «مش فارقة معايا يكون بشنب أو من غير شنب، المهم تكون دقنه مهندمة ومرتبة، ومش بميل للرجل الأصلع، لازم يكون عنده شعر، وأفضل أن يكون لونه بين الأبيض والأسمر، خمري يعني، ويكون رياضي وناجح، وابن بلد وجدع وشيك، ويكون معروف عنه أنه شخص ناجح وذو سمعة طيبة، وأتمنى أن يكون طويل لأني طويلة، ويفضل ألا يكون من إيجيبت، وعادي لو سبق له الزواج، بحب أكون طفلة مع الراجل، ومش أكون أم له علشان الدلع.. وبغير على الحاجات اللي تستحق، وبتكسف أبين غيرتي».