ياسر الطوبجي: اكتشفت الورم بالصدفة بعد خسارة وزني.. وعشت صدمة رهيبة قبل الجراحة

تحدث الفنان ياسر الطوبجي عن فترة مرضه، وظهر يبكي متأثرًا باكتشاف حب كبير ممن حوله.

قال ياسر الطوبجي عبر تصريحات إعلامية: «الحمدلله عدت على خير الوعكة الصحية اللي مريت بيها وأنا دلوقتي في مرحلة التعافي، أنا عرفت الموضوع بالصدفة وده من لطف ربنا بالبني آدم أنا كنت بتعالج من حاجة اسمها جيوب قولونية وهي عند الناس كلها والدكتور قالي أنت خفيت».

وتابع: «بس أنا كنت حاسس إني مش كويس في حاجة مش طبيعية كنت بخس بزيادة والدكتور يقولي طالما مفيش ظواهر معينة أنت تمام لحد ما ربنا بلطفه وكرمه بعتلي دكتور أنا بثق فيه مشفتوش من 10 سنين هو جراح شاف الأشعة وأصر إني أعمل منظار وياخد عينة، أنا كنت بأجل المنظار دا لأني كنت خايف منه».

وأضاف ياسر الطوبجي: «عملت المنظار وأخد العينة أخويا ومراتي خبوا عليا ومقالوليش في الأول كلمت أنا معمل التحليل وقالولي وكانت صدمة رهيبة، وعن طريق النقابة دكتور أشرف زكي قالي أنت محتاج جراح أورام لاستئصال الورم، أنا عرفت في أول شهر يناير وعملت العملية يوم 27 يناير قعدت في العملية 6 ساعات».

واختتم: «والحمدلله في الفترة دي اكتشفت كمية حب من الناس مكنتش متخيل أني أكون غالي أوي كده على الناس، وأنا بعمل العملية كان في ناس عيانين معايا كبار في السن كانوا بيدعولي.. أنا عمري ما اتكلمت في الموضوع ده بس أنا كويس والحمدلله رب العالمين أنا في نعمة كبيرة إني اكتشفت في المرحلة دي وربنا قدرني إن الصعب يارب يكون عدى واللي جاي كله يكون تعافى».