ياسر جلال يكشف سبب حريق لوكيشن «جودر» ويدافع عن شقيقه: الفنانين بيروحوا برجلهم

دافع الفنان ياسر جلال عن شقيقه الفنان رامز جلال، بعد تقديمه برنامج رامز جاب من الآخر، قائلًا: «رامز جلال الفنانين هما اللي بيروحوا له برجلهم».

وتابع ياسر جلال حديثه عن برنامج رامز جلال: «لي زملاء بيندهشوا إن رامز مجابهمش السنة دي.. رامز أصبح مش ظاهرة لكن حقيقة رمضانية، كل الفئات تشاهدوا حتى المتحفظين على شغله وأحييه على شجاعته واستمراريته وبقوله أنت راجل أنك متحمل كل الضغوط دي وفاضل زي ما أنت نجم النجوم ورامز بيعمل خير كبير عشان كده ربنا بيوفقه دائمًا».

تصريحات ياسر جلال

كما رد على تصريحات الفنانة ميار الببلاوي، التي وجهت له رسالة عتاب، بعد لجوئها إليه لمساعدتها في الحصول على دور في مسلسل الفتوة، معلقًا: «ميار أخت عزيزة وغالية، وأنا اشتغلت مع ميار بعد ما خلصت المعهد سنة 1992 في مسلسل اسمه خشوع من إنتاج صوت القاهرة، ومن هذا التاريخ مشوفتش ميار الببلاوي وهي كلمتني في التليفون وقالت عايزة تمثل وكنت في فترة تصوير الفتوة، لأن الدور ينفع لها بالحجاب».

واستكمل ياسر جلال: «أولاً مكانش في أدوار، وثانيًا أي نجم محترم ليس له التدخل في فريق العمل، ده شغل المخرج، وأنا رأيي استشاري وهي عايزاني أفرض وجودها على المسلسل، وأنا لا أرشح زميلات لأني أخاف أتفهم غلط والحاجة الثانية أنا مش بقول على مدير أعمالي اللبيس وأحسها كلمة معيبة، ودائمًا أقول المساعد أو مدير أعمالي، هي ممكن اختلط عليها التواريخ، وأنا بغير رقمي كتير وهي مش معاها رقمي، ويمكن طلبت رقم ثاني وأقول لها مايصحش يا ميار مكانش العشم، أنا لا أذيتك في شيء ولا عملتلك حاجة، وأنا أحترمك ولازلت أحترمك».

ياسر جلال

أعمال ياسر جلال

وتابع: «أنا بحب الاختلاف وخصوصًا بعد الاختيار 3 كان لازم أعمل حاجة مختلفة، ومن قبل الاختيار كان فيه الفتوة وأنا بادئ متأخر فمش عايز أضيع الكام سنة الفاضلين وأقدم شخصيات في أجزاء كثيرة، حابب أعمل كاراكتر مختلف ودور متنوع كل مرة».

وقال ياسر جلال عن مسلسل جودر: «جوهرة مسلسل جودر مختلفة وصعبة وأنا كنت متخوف، واضطرينا منقدموش السنة اللي فاتت فعملت علاقة مشروعة وبعدين رجعت أقدمه لما اطمنت أن كلنا على نفس المستوى من الجدية كفريق عمل ومنتجي العمل كانوا خايفين فلما العمل أصبح 15 حلقة لقوا المسلسل حلو، فقالوا ننزل بألف ليلة وليلة، وكرم ربنا الكبير أن المسلسل نجح والنجاح يعود للنقاد والجمهور لأنهم كانوا من داعمي المسلسل والسوشيال ميديا دعمت المسلسل، ومن هنا أتى النجاح».

ياسر جلال مسلسل جودر

ياسر جلال مسلسل جودر

وقال عن كواليس مسلسل جودر: «اتفاجئت بأداء جيهان الشماشرجي في جودر.. هي تلقائية وعفوية وعندها كاريزما على الشاشة وأنا سعيد إني لحقت اشتغل معاها، لأنها من الأجيال الجديدة اللي بعدينا فإحنا جيل غير الجيل فمش دائما نقدر نتقابل في عمل واحد ونور من أعز أصدقائي هي شخصية محترمة ومش بتاعة مشاكل ومهتمة بشغلها وبس ودي أكتر حاجة بتلفت انتباهي لأي حد وعندها طاقة تمثيلية جبارة، فأنا بستمتع بالشغل معاها وأحمد فتحي من غير ما يتكلم يضحكك وهو موهوب من عند ربنا، يعني ربنا اداله الموهبة دي مخصوص لأن مش اي حد بيعرف يعمل كوميدي وهو اتوهب في الحتة دي والشغل معاه لذيذ ومريح أما هنادي مهنا نزلت المياة ودرجة الحرارة 4 واتعذبت بجد في المشهد ده».

وكشف ياسر جلال سبب حريق لوكيشن مسلسل جودر، قائلًا: «كنت بصور مشهد حريق الدكان، وبعدها بـ 3 أيام حصلت حريق في الدكان الذي بجواره وحريق الاستديو كان المخرج حابب يصور العيش وهو خارج من الفرن طازة، فولع الفرن، وقبل ما يعمل ده استشاره المتخصصين، فولع الفرن البلدي والفرن مكنش معزول فحرقت الجزء اللي إحنا فيه، والموضوع خد وقت عشان نسيطر عليه».

مسلسل جودر

ياسر جلال