ياسر فرج يكشف سر اختفائه 4 سنوات ورفضه العمل مع أمير كرارة

كشف الفنان ياسر فرج سر اختفائه عن الوسط الفني وذلك لمدة استغرقت حوالي 4 سنوات، قائلًا: «كنت ماشي كويس جدًا في الشغل لحد 2017 ولكن مريت بظرف شخصي عائلي قوي».

سر اختفاء ياسر فرج عن الوسط الفني

وتابع في تصريحات تلفزيونية له: «اضطرني إني أتخلى عن حاجات كتير في سبيل الأسرة وقعدت من آخر 2017 وتوقفت حتى 2021.. مراتي الله يرحمها توفت وتعبت تعب شديد وكان لازم أكون موجود».

واستكمل الفنان ياسر فرج: «حتى الآن مش عارف مريت إزاي بالأزمة لما بفكر الوقت مر إزاي وإزاي ربنا حط فيّ إني أتعامل مع الوضع، كان وقت صعب لكن الحمدلله الأمور بتهدأ شوية».

تصريحات ياسر فرج

وقال أيضًا إن الفنان محمد رمضان هو «نمبر وان» الدراما حاليًا، معلقًا: «بسم الله ما شاء الله مسلسله مكسر الدنيا جعفر العمدة محدش يقدر يختلف عليه وده مع احترامي لكل الأسماء، ومحمد رمضان على السوشيال ميديا الناس شايفاه إنه بيستفزهم بالعربيات أو بالأخبار  علشان كده بيتحولوا وبيكونوا ضده».

وأضاف الفنان ياسر فرج: «لكن في ناس تانية بتنتقد محمد رمضان على الأعمال اللي قدمها من قبل مثل عبده موتة، الألماني وشافوا ده وجه جزء كبير من الشباب الصغير لأعمال العنف والشغب ووارد يكون الناس دي عندها حق أنه فعلا ده أثر بنسبة كبيرة لكن أشك إن محمد رمضان يكون عارف وهو بيعمل الأعمال دي أنها هتأثر بالشكل ده».

ياسر فرج وأمير كرارة

وقال ياسر فرج: «النجم وارد يقول للمخرج شايف فلان في الدور ده لكن المخرج أو المنتج لهم الحق في أنهم يقبلوا الترشيح أو لا، ولم يصادف أن فنان رفض ترشيحي لكن صادفت العكس وبعض الزملاء من ضمنهم أمير كرارة كان حابب أكون معاه في عمل لكن الأمور مظبطتش ومقدرتش للأسف أشارك».

واستكمل حديثه عن أمير كرارة قائلًا: «لكن أتمنى أكون مع أمير كرارة وهو من الناس العزيزة على قلبي ومعنديش مشكلة مشتغلش تاني لكن عندي مشكلة إني أعمل حاجة وأنا مضايق مش هعرف اشتغلها حتي لو زميل عزيز زي كرارة أنا بشكره إنه فكر فيّ لكن حسيت إن الدور مفيهوش إمكانيات فرفضته».

كما أعرب عن ندمه من المشاركة في فيلم عايشين اللحظة، معلقًا: «متنفذش زي ما كنت فاهم، ساعات العمل بيكون كويس لكن لما ندخل في مرحلة التنفيذ الأمور بتتغير وده اللي حصل في الفيلم، وأرى أن الفنان أحمد زاهر أفضل فنان قدم دور الشر بين الفنان ماجد المصري وطارق لطفي».

ياسر فرج