ياسمين عز تكشف أسرار ليلة الزفاف في المغرب: بكفاية دلع ماسخ

ياسمين حمادة 18 فبراير 2023 | 08:26 مساءً

تحدثت الإعلامية ياسمين عز عن ليلة الزفاف في المغرب، قائلة: «كنت قاعدة مع سيدة مغربية وقالتلي سر من أسرارهم عن ليلة الزفاف».

تصريحات ياسمين عز

قالت ياسمين عز في برنامجها التلفزيوني حول أسرار ليلة الزفاف في المغرب: «هما عندهم عادة قديمة بيعملوها عن جددهم في الأفراح وهي أم العريس ليلة الزفاف بتدهن رجل العروسة عسل».

وأضافت الإعلامية ياسمين عز قائلة: «وبتدهن جزمة العريس سمنة، وبيحطوا رجل العروسة في جزمة العريس عشان يبقى سمنة على عسل.. هنا العروسة بتطلب دهب مش أقل من هايدي بنت عمها والعريس الغلبان بيخرج من عندهم شعره شايب ومطقطق من كتر الطلبات».

ياسمين عز

نصائح ياسمين عز للبنات

ووجهت نصائحها للبنات، وهي منفعلة قائلة: «عيشي عيشة أهلك ومتتعامليش مع خطيبك أنه بيل جيتس وبيتك مفيهوش غير شاشة 32 بوصة وتطلبي من خطيبك شاشة سمارت عشان تتفرجي على شاهد».

وأضافت ياسمين عز كلامها: «وكمان تتفرجى على مسلسل أزمة منتصف العمر، وبتطلبي غسالة أطباق ومكسلة تغسلي الطبق اللي هياكل فيه فرعونك حبيبك، وبتقولي عايزة تلاجة ميني بار عشان خايفة تمشي على رجلك تجيبي ماية من المطبخ، هاتي كباية ماية جنبك وكفاية دلع ماسخ ملهوش لازمة».

ياسمين عز عن الخلافات بين العريس والعروسة

وعلقت أيضًا على الخلافات بين العريس والعروسة، قائلة: «العريس والعروسة بيتخانقوا على القايمة وبينسوا المودة والرحمة اللي بينهم والعفش بيرجع للعروسة تاني متكسر بسبب العند».

وتابعت: «اللي يأتمن على العرض لازم يخاف عليها أكتر ما يخاف من ورقة قايمة، وبتنسوا كل حاجة وتفتكروا شوية كراكيب وتنسوا الرحمة، والمفروض ولا قايمة اللي تزعلكوا من بعض ولو معاه مال الدنيا إنتي بتنسي إنه صرف اللي وراه واللي قدامه عشان يتجوزك، ومش ورقة منقولات اللي هيضمنوا أنه كويس، أخلاقه وأصله اللي هيضمنوا أنه كويس».

الإعلامية ياسمين عز

وقالت الإعلامية ياسمين عز أيضًا: «الراجل بيقول أنا بشتري سمك في ماية، أو يشتري بطيخة يا تبقى حلوة يا تبقى ماسخة، وخلال فترة الخطوبة يتعرض الراجل لكافة أنواع الضغوط التي لا يتحملها بشر، سواء من العروسة أو أهلها».

واستكملت: «ليه أهل العروسة بيقولولك إحنا بنشتري راجل.. طيب الراجل ده بتشتروه بكام يا حاجة، تقوله عايزة مهر كذا عشان بنت خالتها مدفوع ليها كذا، والعريس يطلع شعره شاب بسبب كمية الطلبات اللي طلبتها.. يابني ياللي بتروح تتقدم لواحدة وتقولك أنا كان متقدملي كذا وفلان، وكان مليونير.. دي واحدة مفيش حد عبرها قبلك والكلام ده كله جيباه من بيوتكم مش من مكان غريب».

ياسمين عز