ياسمين عز لـ «الستات»: الراجل عنده قلبين واحد في صدره والتاني في رجله

إسماعيل هاني 16 فبراير 2023 | 11:17 مساءً

حرصت الإعلامية ياسمين عز، على توجيه نصائح للسيدات بمناسبة عيد الحب، مؤكدة أنه يجب الاحتفال بـ الرجل، تقديرًا لمجهوده.

ياسمين عز في تصريحات تليفزيونية: عيد الحب للراجل تقدير لمجهود طول السنة، وأنا هسميه عيد حب الراجل، وبقول للستات بلاش تنكدي على جوزك عشان متبقيش ملعونة، وحبي تراب رجله وقوليله حاضر 365 يوم، وبوسي راس جوزك ومتنتظريش هدية لأن فرعونك الجائزة الكبرى.

ياسمين عز: والراجل عيونه هي الفيونكة

ياسمين عز تابعت: الراجل عنده قلبين واحد في صدره والتاني في رجله الخلفية، ومتراجعيش ورايا ولو عايزة تتأكدي أسألي دكاترة القلب، يعني حفنة التراب اللي بيمشي عليها دي هدية من قلبه ورجله، والراجل عيونه هي الفيونكة.

ياسمين عز للستات: سيبي مسافة بينك وبين جوزك عشان متدوسيش على ضله

ياسمين عز أوضحت: سيبي مسافة بينك وبين جوزك عشان متدوسيش على ضله، لأن علميًا ممكن يتوجع ويتأثر نفسيًا، وبصيله بـ نظرة المثلث المقلوب من تحت لفوق بـ رقة ودلال ودي عكس نظرة المثلث العادي اللي بنعملها لما بنتضايق من شخص، والراجل هو تاج راسنا ومنبع العسل والسكر وتراب رجله بالدنيا، وتعبان وشقيان طول السنة وبيجيب هدايا بدون مناسبة.

ياسمين عز للرجال: جيب لمراتك حفنة تراب من تحت رجلك في منديل حرير

وأضافت ياسمين عز في نصيحتها للرجال بخصوص هدية عيد الحب: يا فرعون يا تاج الراس يا فرحة حزننا ونعمة ربنا، فرعونا مفيش منه، وحفنة من تراب الراجل بالدنيا، جيب لمراتك حفنة تراب من تحت رجلك في منديل حرير، ولو تعرف قيمتك هتعرف قيمة التراب اللي ماشي عليه، لو هي جعفر هترمي الهدية وده اختبار وسقطت فيه.

ياسمين عز