يسرا اللوزي من مهرجان الجونة: بحاول أوازن بين الأمومة والفن لكن الموضوع مرهق جدًا

حرصت الفنانة يسرا اللوزي على حضور فعاليات مهرجان الجونة السينمائي بدورته الثامنة هذا العام، حيث تحدثت في لقاء خاص عن حبها الكبير للمهرجان، وكواليس مشاركتها الأخيرة في مسلسل لام شمسية، إلى جانب حديثها عن حياتها الأسرية وكيف توازن بين مسؤوليات الأمومة ومتطلبات العمل الفني.

وقالت يسرا اللوزي: "أكتر حاجة بحبها في مهرجان الجونة أولًا إن إحنا بنبقى على البحر، أنا بحب البحر جدًا. ثاني حاجة بتبقى فرصة إن إحنا كلنا نتقابل، دايمًا بقول إحنا آه كلنا في شغلانة واحدة، بس قليل أوي لما بنعرف نتجمع في مكان واحد، فلما بنبقى في سفر كلنا في مدينة واحدة فبتبقى فرصة إن إحنا نتقابل وبيحصل اتفاقات شغل ومقابلات لطيفة".

وأضافت: "بحب أوي الصبح في البلازا، بيبقى في مقابلات وندوات وورش عمل، فبحب أحضر قد ما بقدر، وبحب جدًا جدًا أتفرج على الأفلام القصيرة، لأنه دايمًا الأفلام القصيرة مش بيكون سهل توصليلها بعدين".

وفي سياق متصل، تحدثت الفنانة عن كونها أمًا عاملة في مجال الفن، موضحة التحديات التي تواجهها في التوفيق بين مسؤولياتها الأسرية والمهنية، قائلة: "هكدب لو قلت إن أنا بوازن، بحاول أوازن بعمل أقصى جهدي بس الموضوع مرهق جدًا جسديًا ونفسيًا، وساعات مش بقدر أوازن، وبصراحة أنا مش لوحدي، عندي ناس كتير بتساعدني، طبعًا جوزي بيلعب دور الأب، وعندي حماتي وعندي سبورت سيستم كامل الحمد لله واقف معايا".

أما عن مشاركتها الأخيرة في مسلسل لام شمسية، فأعربت عن سعادتها الكبيرة بالعمل قائلة: "لام شمسية من أكتر الأعمال اللي بحبها، وعلى قد ما الدور كان صعب وتقيل، على قد ما كانت ذكريات تصويره حلوة أوي.. أنا مبسوطة إني اشتغلت مع مريم نعوم وورشة سرد، وكريم الشناوي، واشتغلت مع أمينة خليل ومحمد شاهين وأحمد السعدني، وصفاء الطوخي، وياسمين العبد، بصراحة من أحلى الحاجات اللي أنا عملتها".

واختتمت يسرا حديثها حول أعمالها المقبلة قائلة: "غالبًا في مشروعين لرمضان الجاي، بس لسه مقدرش أتكلم عنهم لأن الاتفاق لسه ما تمش بشكل نهائي، أنا حاليًا بقرأ حاجة وفي حاجة تانية غالبًا برضه، بس لسه يعني".

ويُعد مهرجان الجونة السينمائي واحدًا من أبرز المهرجانات في المنطقة العربية، حيث يجمع نخبة من نجوم وصناع السينما في أجواء فنية راقية، تجمع بين عروض الأفلام وورش العمل والندوات، بهدف تعزيز الحوار الثقافي ودعم صناعة السينما في الشرق الأوسط.