مصطفى بكري يطالب رئيس الوزراء بتوضيح خطة خفض الدين إلى 20%.. فيديو

طالب الإعلامي مصطفى بكري، الدكتور مصطفى مدبولي رئيس مجلس الوزراء، بالخروج لتوضيح تصريحاته الأخيرة بشأن خفض الدين العام إلى نسبة 20%، مؤكدًا أن هذه التصريحات، رغم ما تحمله من مؤشرات إيجابية، أثارت حالة من الجدل والقلق داخل الشارع المصري وخارجه، في ظل غياب التفاصيل المرتبطة بآليات التنفيذ والإطار الزمني.

وأضاف مصطفى بكري، خلال تقديمه برنامج «حقائق وأسرار» المذاع على قناة صدى البلد، قائلًا: «أنا بتكلم على تصريحات السيد رئيس الوزراء، الكلام اللي اتقال بقدر ما هو بيسعد الناس بقدر ما عمل قلق كبير جوه مصر وبره، ولازم لازم السيد رئيس الوزراء يطلع يقول إيه المقصود، وإيه الإطار الزمني، وإزاي هنتمكن نوصل إن الدين الخارجي والمحلي ينزل للنسب اللي اتقالت».

وتابع بكري: «إزاي وأنا عندي حوالي 84% من الناتج القومي، إزاي هننزل لـ20%؟ لازم تقولوا للناس إزاي، عشان فيه جدل كبير، والناس بتسأل هل فيه مقايضة؟ ولا فيه سيناريوهات، لازم يكون في مؤتمر صحفي سريع، البورصة يوم الأحد لازم تطمئن الناس، متخليش الناس شمال ويمين، اطلع اتكلم بكرا خلي الناس تطمن والبنوك والمستثمرين؟»، مطالبًا رئيس الوزراء بسرعة عقد مؤتمر صحفي لشرح تفاصيل الخطة بشفافية كاملة.

وأشار الإعلامي إلى أن الشارع يتساءل عن الأدوات والوسائل التي ستُستخدم لتحقيق هذه الأهداف، قائلًا: «الناس بتتكلم وبتسأل الوسائل اللي هتستخدموها إيه؟ عشان الصورة تتوضح ونشيل اللبس واللغط اللي انتشر بشكل واسع جدًا».

واختتم مصطفى بكري حديثه بالتأكيد على أن توضيح هذه الرؤية سيُسهم في طمأنة المواطنين والمستثمرين والبورصة والبنوك، مضيفًا: «الشعب المصري عايز يطمن، والمستثمر عايز يطمن، وأنا واثق إن لو رئيس الوزراء طلع واتكلم بوضوح، الناس هترتاح».