17 يوما دون طعام.. محمد ممدوح يكشف أسراره ومفاجأة بشأن زوجته لأول مرة

كشف الفنان محمد ممدوح سبب فقدانه حوالي 45 كيلو من وزنه، بجانب أسرار من حياته الشخصية والفنية وعلاقته بعدد من نجوم الفن.

قال الفنان محمد ممدوح عن فقدان وزنه، في تصريحات تلفزيونية له: «استمريت على صيام المياه.. ومكنتش أعرفه في البداية لكن اللي شجعني مدير أعمالي وهي أنك تصوم لكن تشرب مياه بس».

سبب فقدان وزن محمد ممدوح

وتابع: «قعدت 17 يوم بشرب مياه بس دون أكل خالص وإحنا كنا في تجمع في فندق ومعانا دكاترة بيراقبونا ويشوفوا السكر والضغط وكانت تجربة حلوة وأي جوع أو صداع أشرب مياه ودة كان من سنين وبسببه فقدت وزن كتير ولغاية دلوقتي بشرب مياة كتير.. الموضوع مبهر وكنت حاسس إني هادي وصافي ودي حاجة علمية وحاجات كتيرة بتشفى بالمياه ودة لأي سن».

وأضاف الفنان محمد ممدوح قائلًا: «بقى لي نظام حياة بأكل كل ساعتين وبشرب مياه كتير وخسيت 45 كيلو، إحنا لما بدأنا نأكل مكنش ينفع مرة واحدة يعني نشرب عصير الأول وبعد كدة ناكل حاجة خفيفة أوي وكان في صديق أول لما خلص سافر ألمانيا وقبل ما يسافر أكل فول وطعمية من القاهرة ولما وصل ألمانيا تعب ودخل المستشفى.. فخطر أنك بعد الصيام تاكل حاجة تقيلة».

مسلسلات رمضان 2023 محمد ممدوح

محمد ممدوح وزوجته

وتحدث أيضًا عن زوجته وعلاقته بها، موضحًا أنها ليست كما يعتقد الجمهور أنها خارج الوسط الفني، فهي كانت تحاول دخول الوسط، وبالفعل كانت تعمل منتجة لأحد البرامج، وشاركت في ورش تمثيل.

وأشار إلى أنه مع إنجاب ابنتهما «كاميليا»، تركت زوجته العمل كمنتجة، مضيفًا: «هي غيرت كل شئ في شخصيتي وأنا بقيت عايش لها.. ميرڤت ربنا يخليها مستحملاني وحاجات كتير في حياتي مكنتش هتكمل إلا بفضل ربنا طبعًا ووجودها جنبي».

أعمال محمد ممدوح

كما كشف الفنان محمد ممدوح أيضًا سبب نجاح فيلم وش في وش، لافتًا إلى أن البطل الأساسي في الفيلم هو السيناريو، معلقًا: «الورق حلو أوي وبطل العمل هو وليد الحلفاوي والمونتاج مكتوب في الورق ودي تجربة جديدة وإنتاجه مش كبير واللي شايفه مفيد من العمل ده أن السوق فيه حاجات كتيرة ومش لازم العمل يكون إنتاجه كبير».

واستكمل حديثه: «الفيلم هو مشكلة اجتماعية عادية هو مشكلة اتنين عايزين يطلقوا لكن مكتوب حلو وفيه كوميديا الموقف مش مجرد إفيه.. الفيلم به عوامل نجاح أي عمل شركة إنتاج بتدعم الفيلم والمخرج ومدير التصوير والممثلين وفي مفاجآت كتير للناس أن الممثلين دول بيضحكوا أو جداد زي دنيا سامي وهو تجربة جديدة والناس محتاجة تجربة جديدة».

محمد ممدوح ومحمود عبد العزيز

ولأول مرة يكشف محمد ممدوح عن التعديلات التي أجراها على شخصيته في مسلسل جراند أوتيل، قائلًا: «شخصيتي في جراند أوتيل كانت محيراني وتعبت تامر حبيب لأن الدور مكنش مكتوب كدة وأنا من المعطيات اللي تامر كان كاتبها كنت شايف أن الحاجات اللي هو بيعملها دي محتاجة حد مخه على قده أنه يبقى عارف أن الولد مش ابنه بس هو مصدق أنه ابنه فلازم يبقى في حاجة غلط».

وتابع: «فبدأت اقرأ عن نوع من التوحد هو التوحد النفسي بسبب التربية واتكلمت مع دكتور نفسي لكن الرؤية مكنتش واضحة وهما مكنوش فاهمين أوي لغاية أول مونتاج.. المخرج قالي كمل كدة خصوصًا أن النقلة دي ممكن تأثر على باقي الورق لكن تامر لما عجبته بدأ يغير شوية في الورق».

واختتم حديثه بتعاونه مع الفنان الراحل محمودة عبد العزيز، حيث انبهر بالعمل معه في فيلم إبراهيم الأبيض، معلقًا: «أعتبر مشاركتي في الفيلم علامة مهمة في حياتي».