7 نصائح لتجنب الأفكار السوداوية.. منى هلا تروي تجربتها القاسية مع الجبس

شاركت الفنانة منى هلا متابعيها وجمهورها معاناتها مع الجبس، من خلال فيديو نشرته على حسابها الرسمي بموقع انستجرام.

قالت منى هلا في الفيديو: «الجبس أكتر شيء ممل في الحياة، مقترحات للمجبسين عشان ما يعملوش حاجة في نفسهم من الملل».

معاناة منى هلا مع الجبس

وقدمت النصائح السبعة قائلة: أولا العياط هيبقى جزء أساسي من يومك عادي تعامل معاه بشكل طبيعي.. ثانيا لازم تشغل وقتك بأي حاجة مفيدة عشان لو عايش لوحدك ممكن يجيلك أفكار مش تمام.. ثالثًا خلي عندك أرقام للطوارئ وعرف حد من المقربين واتكلم معاهم بصراحة عن مشاعرك.. رابعًا أسمع لجسمك لأن غالبًا هيدوك أدوية كتير ممكن تنام بسببها أحيانًا 20 ساعة في اليوم، أسمع جسمك ولا تشعر بالذنب إنك بتضيع وقت أبدًا».

وتابعت منى هلا: «خامسًا كُل كويس جدًا واعتني بنضافتك الشخصية لأن دي بتفرق في النفسية.. سادسًا مارس هواياتك المفضلة وحاول تعمل كل الحاجات اللي كنت مأجلها زي القراءة، الكتابة، الفرجة على أفلام ومسلسلات، الخياطة، وهكذا.. سابعًا خلي علاقتك الاجتماعية مع الناس اللي بتحبهم قوية في الوقت ده وبلاش تقعد لوحدك كتير عشان دماغك متتسلوحش في أفكار سودوية».

تصريحات منى هلا

واختتمت: «لو حد عنده أفكار تانية يبعتلي، خلوا بالكم من نفسكم وصحتكم، وبلاش تضغطوا على أى إصابة عشان ما تتحطوش في الجبس زيي.. ملحوظة أنا كان عندي الإصابة دي من سنتين تقريبًا ولظروف شخصية وظروف عمل خارجة عن إرادتي كملت شغل وأنا رابطة رجلي لأن مكنتش حاسة بالألم من المسكنات لكن بعدها الموضوع باظ والدكتور خلاني في الجبس وبعدها علاج طبيعي فترة طويلة بس الحمدلله خفيت مع الوقت وبقيت كويسة.. وأحيانًا الإصابات اللي ممكن نستهون بيها بتقلب خلوا بالكم، أتمنى الشفاء لكل المرضى ولو حد متجبس أتمنى يخف بسرعة ويرجع يمشي طبيعي تاني».