تحدثت الفنانة منة فضالي عن سبب ابتعادها عن الشاشة مؤخرًا، وتفاصيل المنشور الذي قالت به «البقاء لله في الشغلانة».
قالت منة فضالي عبر تصريحات إذاعية: «أنا مش ضد إن جيل جديد يطلع، لأن إحنا كنا في يوم من الأيام جيل جديد، بس عمرنا ما كنا الجيل الجديد بياخد مكان الجيل القديم، كنا بناخد فرص خطوة خطوة ووقتها مكانش في محاسيب أوي، مكانش المخرج حد يقول له أعمل كذا أو جيب كذا».
تصريحات منة فضالي عن قلة العمل
وتابعت: «النهاردة أنا ضد قلة الموهبة، لو حد موهوب وشاطر وشاطرة معنديش اعتراض، لكن أنا ضد يبقى حد مبيعرفش يتكلم أصلا أو مبتعرفش، ليه تفرض عليا حد دمه تقيل مبيعرفش يقول مخارج الألفاظ!.. أنا موقفة تقريبًا أتفرج على مسلسلات لأن في ناس غريبة أوي، ممكن يكونوا ناجحين في حتتهم لكن مش ناجحين في حتتنا».
وأضافت منة فضالي: «مينفعش أجيب حد بيقول بسم الله ويبقى نجم شباك أو مسلسل، في ظل إن عندك نجوم قاعدة في البيت أنت كنت بتبيع بيها وتشغلها، وكان لها أفلام ومسلسلات كل سنة، أنا واحدة من الناس كنت بشتغل كتير جدًا مبقتش أشتغل، السنة اللي فاتت عملت عمل واحد، في ظل كل المسلسلات الأوف سيزون دي أنا فين؟».
حقيقة اعتزال منة فضالي
واستكملت: «قلت السنة دي لو الدنيا مظبطتش معايا هبيع كل حاجة وأهاجر مع والدتي وأعمل مشروع برة مصر، مش هتحمل أمشي في الشارع ويسألني الناس: أنتي فين؟ أنا لسه صغيرة، أومال لما أكبر هيعملوا فيّ إيه؟ وبسأل نفسي ليه مخدتش فرصة وليه مقدمش بطولة مسلسل؟ فكرت أطلع لايف أتكلم مع الناس بس حسيت الموضوع هيكون رخيص».
وقالت منة فضالي أيضًا: «أنا طول الوقت جنب والدتي، وهي مريضة وتحتاج لي في كل دقيقة، وكل زملائي اتصلوا بي بعد منشورات اتكلمت فيها عن رغبتي في الاعتزال وغضبي من الحالة الحالية في الفن، للأسف الوسط الفني ملوش أمان، وإذا اختفيتي شوية بينساكي الكل وفي النهاية كل شيء قسمة ونصيب».
واختتمت حديثها: «لا أنتمي إلى شلل داخل الوسط الفني وربما إذا ذهبت إلى حفل أو عيد ميلاد، أشعر بأنني منبوذة أو وحيدة وربما أكون أنا السبب لأنني منطوية منذ فترة طويلة، ولا أحب الاختلاط كثيرًا لأنه يجلب المشكلات لكن أنا قريبة من أحمد السقا ومحمد سامي وكريم عبدالعزيز، وربما تكون لدى بعض الفنانات مشكلات معي، رغم أنني أحب الجميع، أما اختياراتي في الزواج مدمرة حياتي، وأنا شخصيًا أتمنى، والله أن أكوّن أسرة، وحلم حياتي أعيش حياة الأمومة وأنا أفنيت حياتي في مهنة الفن، وكان نفسي أولًا أبني رصيد فني جيد، ثم أفكر في تكوين أسرة وأوفر لأولادي حياة لم أعشها وأتمنى أتزوج شخص جيد يراعي ربنا في حياتي، لكنني أخاف من الرجال وأصبحت شكاكة وتعرضت للجرح كثيرًا وتعرضت للخيانة كثيرًا، وليس لديّ استعداد للمشكلات».
