كشف إبراهيم حسن، مدير منتخب مصر الأول لكرة القدم، عن كواليس صعبة عاشها شقيقه حسام حسن، المدير الفني للفراعنة، خلال الفترة الماضية، مؤكدًا تعرضه لأزمات صحية خطيرة كادت أن تنهي حياته، وذلك في سلسلة منشورات عبر حسابه الشخصي على موقع التواصل الاجتماعي «فيسبوك».
ودافع إبراهيم حسن عن شقيقه في مواجهة الانتقادات التي يتعرض لها، كما تحدث عن حجم التضحيات التي يقدمها من أجل منتخب مصر، مطالبًا بوقف الهجوم عليهما، وجاءت منشوراته على النحو التالي:
المنشور الأول:
“اتقوا الله في مصر ليه عاوزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر، أسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر”.
المنشور الثاني:
“افتكروا حسام حسن المخلص والمحب لبلده اللي بينتحر علشان يفرح بلده من منا بلا أخطاء ولا ابتلاء في حياته؟.. ورغم كل ظروفه الخاصة لديه عمله واسم بلده وبيفصل وبيرمي كل حاجة ورا ضهره ليه بنتحارب بالشكل ده عند كل موقف ليه قبل كل معسكر بيتعلن علينا الحرب الشرسة دي؟”.
المنشور الثالث:
“ليه الغل من زمايل لينا كنا بناكل في طبق واحد وكنا حاملين شعار واحد وهو علم مصر، ليه الغل من معظم الإعلاميين والحرب والهجوم غير المبرر في كل صغيرة وكبيرة والتقليل من أي نجاح بنعمله، ليه بنكبر الصغير على الكبير وبننسى الأصول اللي الشعب المصري متربي عليها”.
المنشور الرابع:
“نصيحة ورسالة للزملاء اللي نفسهم يبقوا في مكانه، نجاحنا أنا وحسام هو اللي هيديك الفرصة بعد كده تبقى موجود مكانه علشان اللي بياخد القرار يبقى مطمن من تجربتنا ويديك فرصتك وميخافش وننسى الأجنبي لكن أنا لو فشلت مش هتجيلك”.
المنشور الخامس:
“معلومة مكنتش عاوز أقولها.. هل تعلم أن حسام أصيب أكثر من مرة أثناء المعسكرات والمباريات والتصفيات بذبحة واتلحق بالصدمات في آخر لحظة وبعدها بفترة صغيرة عمل دعامات وبعدها بشهر دخل غرفة العمليات تاني وقالوا ساعة علشان يضحكوا عليا”.
المنشور السادس:
“فضلت منتظره يطلع من غرفة العمليات وقعدوا يقولوا أي حاجة علشان متخضش والحمد لله طلع وبرضه مقدرش ايه سبب المدة دي كلها، بعدها بأيام روحت المستشفى أعمل تحاليل عادية قابلت الدكتور بالصدفة اللي عمل العملية قالي كنت مخبي عليك سبب التأخير إن حسام بنسبة كبيرة مكانش هيطلع من غرفة العمليات عايش”.
المنشور السابع:
“وده لأن العملية كانت في شرايين القلب وكانت معقدة جدا ومن المواقف مباراة البرازيل.. بعد العملية مكانش قادر يمشي ولا يقف وكان الوضع صعب عشان الكاميرات واللاعيبة ميحسوش بحاجة ويأثر عليهم معنويا قولتله يقعد وأصر يقف على الخط”.
المنشور الثامن:
“كل التفاصيل دي محدش كان يعرف عنها حاجة حتى اخواتي غير الدكتور محمد أبو العلا وطاقم الدكاترة في المستشفى.. معلش دي فضفضة من كتر الجحود والحروب اللي احنا شايفينها أنا وحسام بس مش هيقدروا يوقعونا ولا يوقفونا عشان مصر تستحق التضحية دي مننا”.
وتأتي تصريحات إبراهيم حسن في ظل الجدل المثار حول الجهاز الفني لمنتخب مصر بقيادة حسام حسن، حيث حرص مدير المنتخب على التأكيد أن شقيقه يواصل أداء مهمته رغم الظروف الصحية الصعبة التي مر بها، مشددًا على تمسكهما بالاستمرار في خدمة الكرة المصرية.
