كشفت الفنانة صبا مبارك نظرتها إلى اختياراتها الفنية، موضحة أنها أصبحت تمتلك القدرة على رفض الأعمال التي لا تنال إعجابها بسبب شعورها بالأمان المالي.
قالت صبا مبارك عبر تصريحات تلفزيونية: «بقى عندي القدرة لو العمل مش عاجبني أقول لأ، عندي الأمان المالي الحمدلله مستورة، وحصل إني قعدت في البيت لما كنت محتاجة فلوس لأن عندي شغف بالحاجة اللي بعملها، وأنا أسهل واحدة في العالم لو مش لاقية حاجة مختلفة أعملها هقعد في البيت».
وأضافت: «صدف إني عملت أعمال مش بحبها بس كنت بكون في أتعس حالاتي، مستعدة أضغط على نفسي وأشد الحزام لو حسيت أن العمل مش هيخلني هقدم حاجة».
واستكملت صبا مبارك: «آخر اهتمامي تقييمي لشكلي جميلة ولا وحشة، لما ده بيتشال بيبقى أمتع وأحلى لأنك مش بتفكر في حاجة غير مشاعرك، والتمثيل بيكون صافي».
وأضافت صبا مبارك: «ومكنتش حاطة ميك أب في حكاية جريمة في الزمالك، والجرح اللي فوق شفايفي ده جرح حقيقي، ودكاترة كتير نصحوني أعمل فيلر ورفضت».
وقالت عن حكاية جريمة في الزمالك: «مترددتش ولا ثانية بقبول الدور أنا اللي سعيت إني أكون موجودة في سلسلة القصة الكاملة، الممثل كل فترة في حياته الفنية يتم وضعه في قالب معين، الفتاة البريئة مثلا وأنا من فترة بدور على دور يستفزني ويكون مختلف وأنا بحب سلسلة القصة الكاملة لسامح سند وأنا اللي فتحت الباب مع مجدي الهواري وقلتله إني حابه أكون موجودة واتكلمنا عن أكتر من قصة وفي الآخر اخترنا جريمة في الزمالك».
واختتمت: «حلاوة القصة إني لما قرأتها كلنا قلنا إنها جريمة ناعمة مش شبه باقي الجرائم فيها دموية شديدة، وده كان تحدي أن القصة مبنية تفاصيلها نفسية ومحتاج إحكام في التمثيل».
