رد الفنان أحمد فلوكس على رسالة اعتذار الفنان محمد رمضان للفنان القدير فاروق فلوكس، بسبب الجدل الذي أثير بعد رسالة تهنئته على الخطوبة وطلبه للمشاركة معه في مسلسل عشماوي.
كتب أحمد فلوكس في منشور عبر حسابه الشخصي بموقع فيس بوك: «لا يوجد بين الأخوة اعتذار يا محمد وأبوك فاروق بيقولك أنت وأحمد واحد عنده وأنت أخ وعزيز وبنتمنالك النجاح دائمًا يا محمد».
وتابع: «وربنا يعطيك وتمتع جمهورك بأعمال مميزة، وربنا يخليك لإخوانك ولأولادك ولعائلتك الكريمة، ومستني نشوف عمل مختلف السنة دي بإذن الرحمن، أما أنا فهستني أفطر معاك في رمضان ونتفرج على حلقة من حلقات مسلسلك مع بعض.. ربنا يوفقك تحياتي».
وقال أحمد فلوكس عبر تصريحات تلفزيونية ردًا على جدل رسائل محمد رمضان له: «محمد زميل كفاح لأن حضرنا بعض وأنا قبله شوية لكن شوفت خطواته.. محمد ناجح وشاطر ومجتهد وممثل كويس وبيحب يسيب بصمة وله باع طويل في أنه ينجح بمشوار طويل».
وفيما يخص كونه شعر بالإهانة بسبب حديث محمد رمضان عنه، رد قائلًا: «إحنا ناس مسؤولة مبنفكرش في نفسنا أكتر ما بنفكر في اللي مسؤولين مننا بفكر في أبويا وممكن الشيطان يخليني أشوف إن دي إهانة وهي مش إهانة، وحطيت 100 ألف سبب وعذر أنه يكون مثلا مش واخد باله ومحمد ذكي وممكن يفعل شيء بعفوية لكن أما يراجع نفسه يتراجع ومحدش فينا معصوم من الخطأ وأنا أول واحد وأنا كان عندي تصرفات اندفاعية».
واختتم: «إحنا زمايل وممكن أكون فاهم حاجة وتطلع غلط والمفروض إننا زمايل وقدوة للي بيشوفنا ولازم نتكلم على بعض كويس ونحط ده في الاعتبار، وإحنا كأهل مهنة عاشرنا بعض وكل واحد شاف التاني تعب إزاي عشان يوصل، أنا اتربيت كدة، ومش هروح أشتغل دور واعتذرت عن مسلسل غادة عبدالرازق في رمضان وطلبت مشهد ضيف شرف علشان أجامل غادة ومعنديش مانع في فكرة ضيف الشرف»، لافتًا إلى أن الفنان أحمد العوضي اتصل به بعد رسالة محمد رمضان وكانت مكالمة عادية.
