كشف الفنان التونسي ظافر العابدين، أنه منذ سنوات اصيب بورم خبيث في الرئة وكانت صدمة له هو أسرته.
ظافر العابدين ورحلته مع المرض
تحدث الفنان ظافر العابدين في تصريحات إذاعية عن فترة مرضه، وقال: «أنا هحكي سر مفيش مخلوق يعرفه عني غير أهلي وبقوله لأول مرة في الإعلام».
وتابع: «أنا كنت أب لأطفال صغيرين ومهتم بصحتي جدًا وفوجئت من كام سنة بكحة غريبة ومعاها نقطتين دم، الطبيب أمرني أعمل أشعة فورًا، وكانت المفاجأة إن عندي نزيف رئوي حاد، وطلع عندي سرطان، ورم خبيث في الرئة».
رحلة ظافر العابدين مع المرض
استكمل ظافر العابدين حديثه، عن فترة مرضه وقال: «الأطباء قالولي يومها كويس إنك عايش، انهرت انا وأسرتي وأولادي ودخلت في أزمة نفسية رهيبة».
حديث ظافر العابدين مع الله
روى ظافر العابدين عن تجربته مع المناجاة مع الله، خلال فترة مرضه، وقال: «ملقتش قدامي غير إني أكلم ربنا، وبقيت أهتف من جوايا لربنا بكلمة واحدة عايز أعيش، ودخلت في نوبة بكاء وأنا بقول لربنا أنا آسف حقك عليا . أنا مشبعتش من الدنيا وعاوز أربي أطفالي وآخد بالي من أمي وإخواتي».
وأضاف: «كنت ببكي بحرقة، رغم إني من عادتي مبكيش كتير في حياتي، ورحت لأكبر دكتور في مجال الأورام، واتحجز لى عملية، قبل العملية كلمت ربنا مرة تانية وقولتله محدش في إيده ينقذني غيرك وطلبت منه مهلة أعيش شهر، دخلت العملية مكنتش شايف حد حواليا.. كله خيالات.. لكن من رحمة ربنا بيا أنزل عليا السكينة فطبطبت على إيد أمي وقلت لها متخافيش انا راجع تاني».
اختتم ظافر العابدين حديثه عن مرضه وقال: «أول ما فتحت عيني بعد العملية اللي استمرت ساعات كنت فرحان زي الطفل واتكتب لى عمر جديد ومكنتش مصدق إني عشت، بعد نجاح العملية وشفائي من السرطان عقدت اتفاق مع ربنا، عملت ديل فيه تفاصيل مش هينفع احكيها ولا حد يعرفها .. وانا دلوقتي ماشي بموجب الاتفاق دا لحد النهاردة، أنا بشكر ربنا مرة واتنين وألف.. لأني سبق وطلبت منه أعيش شهر.. وأديني عايش سنين».
