«مبنية على طمع البني آدم وبتخلي الواحد مش شايف قدامه» بهذه الكلمات وصف عبدالرحمن أحد متضرري تطبيق المراهنات؛ تفاصيل خسارته في لعبة المراهنات وتوقفه المفاجئ عن اللعب.

وقال عبدالرحمن خلال لقائه مع الإعلامية نهال طايل ببرنامج «تفاصيل» المذاع على قناة صدى البلد 2، دخلت اللعبة بـ200 جنيه، وبعدين كسبت 4 آلاف جنيه وخسرتهم في 10 دقائق علطول، واصفًا إياها: «اللعبة فيها حاجة مبتخليش الواحد يطلع منها نهائي، ومستحيل أي واحد يكسب فيها ويطلع بسهولة، لأنها مبنية على طمع البني آدم وبتخلي الواحد مش شايف قدامه».

وتابع: اللعبة وصلتني في الآخر إلى خسارة 100 ألف جنيه على مراحل مختلفة، وقابلت ناس صحابي كتير خسروا مبالغ مالية أكثر مني، وتسببت ليهم في ارتكاب أفعال إجرامية كبيرة، بين السرقة والنهب وإمضاء شيكات، ووصل الحال في بعض الأوقات للجوء البعض لبيع أجزاء من أعضاء جسده.

ملهاش وقت وممكن تخسر فلوسك اللي كسبتها ومتعرفش تسحبهم

وأكمل عبدالرحمن: أكتر رقم كسبته في تطبيق المراهنات كان 4 آلاف جنيه و12 ألف جنيه، وكل ما أخسر كل ما يشتد بي الحال للعب مرة أخرى لتعويض الخسارة، والمراهنة في الأرقام المرتفعة.

واستكمل: اللعبة ليها أرقام كتير عشان أحول عليها فلوس كاش، وكل شوية الأرقام بتتغير، وفيه ناس بتحول الفلوس ليها وبعدين تتفاجئ إن الفلوس متحولتش أو موصلتش ليها على التطبيق، وكده بتكون راحت عليهم.